Sansar News
काठमाडौं । नेत्रविक्रम चन्द ‘विप्लव’ नेतृत्वको नेकपाले आगामी असोजमा महाधिवेशन गर्ने भएको छ । १२ देखि १७ जेठसम्म बसेको सो पार्टीको केन्द्रीय समिति बैठकले महाधिवेशन गर्ने निर्णय गरेको हो ।
बताइएअनुसार नेकपाले पार्टीको नवौं महाधिवेशन आगामी असोज १ देखि ८ सम्म काठमाडौंमा गर्नेछ ।
महाधिवेशन अघि ५ भदौसम्म वडा र पालिका सम्मेलन तथा १५ भदौसम्म जिल्ला सम्मेलन गर्ने निर्णयसमेत गरेको छ । यसअघि गत फागुनमा नै महाधिवेशन गर्ने तयारी थियो । तर, स्थानीय तह निर्वाचनमा जाने विषयमा अन्तरविरोध बढेपछि पार्टी विभाजन भएपछि महाधिवेशनको नयाँ मिति तय भएको हो ।
बैठकले गरेको निर्णय सार्वजनिक गर्न आयोजित पत्रकार सम्मेलनमा महासचिव विप्लवले पार्टी विभाजन गर्नेहरूलाई अराजकतावादीको संज्ञा दिए । हेमन्त प्रकाश ओली र धर्मेन्द्र बास्तोलालगायतलाई उनले रुढीवादी, जडसुत्रवादी, बुर्जुवा अराजकतावादीको आरोप लगाए ।
महासचिव विप्लवले पार्टी छाडेका नेताहरूलाई फर्कन पनि आग्रह गरेका छन् ।
वि.सं.२०७९ जेठ २० शुक्रवार १७:३६ मा प्रकाशित
