हामी सबैकाे संसारन्यूज

काठमाडौं । बाघबाट सुरक्षाको माग गर्दै आन्दोलनमा उत्रिएका स्थानीयबासीमाथि प्रहरीले गोली चलाएको छ ।

प्रहरीको गोली लागेर मधुवन नगरपालिका २ की करिब २० वर्षीया नविना थारुको मृत्यु भएको  छ ।

बाघको आक्रमणबाट स्थानीय घाइते भएपछि सुरक्षा दिन माग गर्दै बर्दियाको गुलरिया–राजापुर सडक खण्डको मधुवन नगरपालिका वडा न २ को ओरोली बजारमा सोमबार प्रदर्शनमा उत्रिएका स्थानीयमाथि प्रहरीले गोली चलाउँदा एक किशोरीको मृत्यु हुनुका साथै प्रहरी र स्थानीय गरी दर्जनबढी घाईते भएको बताइएको छ ।

स्थानीयबासी प्रदर्शनमा उत्रिएपछि बजारको बाटो खुलाउने क्रममा प्रहरीमाथि ढुंगामढा प्रहार भएपछि पहिले हवाई फायर अश्रुग्यास प्रहार गर्दापनि प्रदर्शनकारी पछि नहटेपछि आफुहरु गोली चलाउन बाध्य भएको प्रहरी निरीक्षक हृदयश सापकोटाले बताएका छन् । उक्त घटनामा प्रहरी हबल्दार पार्वता खड्का लगायतका १८ जना प्रहरी घाईते भएको सापकोटाले जानकारी दिए ।

सोमबार बिहान ८ः४५ मा स्थानीय महिलाले खेतमा काम गरिरहेका बेला बाघले आक्रमण गरेको थियो । उनलाई स्थानीयले उद्धार गरेर नेपालगन्ज अस्पतालमा उपचार गर्न पठाएका थिए । उक्त घटना लगत्तै बाघबाट सुरक्षा दिन माग गर्दै स्थानीयले प्रदर्शन गरेका थिए । स्थानीयले झण्डै ५ घण्टासम्म बाटो अवरोध गरेपछि बाटो खुलाउने क्रममा प्रहरीमाथि ढुंगामुढा प्रहार भएपछि पहिले अश्रुग्यास र हवाइ फायर गरेको र अन्तिममा गोली चलाउन बाध्य भएको सापकोटाले बताए ।

‘ पहिले अश्रुग्यास र हवाइ फायर गर्यौं,’ प्रहरी निरीक्षक सापकोटाले भने, ‘त्यति गर्दा पनि आक्रमण नरोकिएपछि प्रहरीले गोली चलाएको हो।’ उनले प्रहरीले एक राउण्ड मात्रै गोली चलाएको दावी गरेका छन् ।