हामी सबैकाे संसारन्यूज

काठमाडौं । कालीमाटी तरकारी बजारमा मंगलबार भित्रिएको काउलीमा उपभोक्ताको शरीरमा अत्यधिक असर गर्ने विषादी भेटिएको छ । मकवानपुरको थाहा नगरपालिका वडा नं ९ बाट मंगलबार बिहान कालीमाटीमा भित्रिएको काउलीमा खान नहुने विषादी भेटिएको हो ।

कालिमाटी तरकारी बजार व्यवस्थापन समितिले प्रयोगशालामा परीक्षण गर्दा उक्त काउलीमा ९१ प्रतिशत विषादी भेटिएपछि ३९ किलो काउली नष्ट गरिएको समितिले जनाएको बुधबारको गोरखापत्रमा समाचार छ । उक्त काउली उपभोग गर्दा उपभोक्ताको स्वास्थ्यमा गम्भीर असर पर्ने बताउँदै प्रयोगशालाले नै उक्त काउली तत्काल नष्ट गर्न समितिलाई आग्रह गरेको थियो ।

उक्त काउलीको नमुना प्रयोगशालाबाट परीक्षण भएर आउदासम्म केही काउली बजारमा गएको हुन सक्ने समितिका निर्देशक विनय श्रेष्ठ बताउँछन् ।

‘पहिले परीक्षणका लागि नमुना लिएका तरकारी बिक्रिी गर्न रोक्ने गरिन्थ्यो अहिले यो चलन छैन । त्यसैले बजारमा गएको हुनुपर्छ ।’ श्रेष्ठले भनेका छन् । तर, सम्बन्धीत व्यापारीले उक्त काउली बजारमा नगएको दाबी गरेका छन् ।
आर्थिक वर्ष २९७८/७९ साउन १ गतेदेखि जेठ २४ गतेसम्म कालिमाटी द्रुत विषादी विश्लेषण एकाईमा २ हजार ५७६ वटा नमुना परीक्षाण गरिएकोमा ४६ वडामा विषादी रोकावटको दर ४६ प्रतिशत माथि पाइएको थियो ।

कालीमाटीमा विषादी बढी भेटिनेमा टमाटर, काउली, बोडी, हरियो फर्सी, भेडेखुर्सानीलगायत पाइएको प्रयोगशालाले जनाएको छ ।