Sansar News
काठमाडौं । मुग्लिङ–नौबिसे सडकखण्ड अन्तर्गत चितवनको इच्छाकामना गाउँपालिका वडा नम्बर ४ स्थित नाग्दी खोलामा बुधबार राति गएको पहिरोका कारण बन्द भएको सडक १२ घण्टा वितिसक्दा पनि खुल्न सकेको छैन ।
पहिरो पन्छाउने क्रम जारी रहेपनि वर्षाका कारण केही स–साना पहिरोहरु निरन्तर खसिरहेका छन् । पहिरोका कारण बिरामी बोकेका कैयन् एम्बुलेन्ससहित हजारौँ यात्रुहरू सडकमै अलपत्र परेका छन् ।
पहिरोले पुरिएको सडक खुलाउन रातिदेखि नै सडक विभाग, ट्राफिक प्रहरी, स्थानीय निकाय आदिलाई ताकेता गरिरहँदा पनि बिहिबार बिहान मात्रै सडक विभागबाट बल्ल–बल्ल एउटा जेसीबी ल्याएर सडकको पहिरो हटाउने क्रम जारी रहेको सोहि पहिरोका कारण अलपत्र परेका यात्रु सुदीप काफ्ले बताउँछन् ।
‘यस्तो भूखण्डमा वर्षादको समयमा पूर्वतयारी केही नहुनु दुःखलाग्दो विषय हो । जिम्मेवार निकायसँग स्रोत र साधनको कमी देखियो । भएका स्रोत र साधन पनि केही बिग्रेका, केहीले इन्धन नभएको भनेर जानकारी गराउनु कहाँसम्म लापरबाही हो ?’ काफ्लेले संसारन्युजसँग भने ।
वि.सं.२०७९ जेठ २६ बिहीवार ११:०६ मा प्रकाशित
