हामी सबैकाे संसारन्यूज

काठमाडौं । नेकपा (माओवादी केन्द्र)भित्र पनि मन्त्री फेरबदलको चर्चा छ । हालै नेकपा (एकीकृत समाजवादी)ले मन्त्री फेरबदल गर्न प्रधानमन्त्री शेरबहादुर देउवालाई गरेको सिफारिसपछि नेता वर्षमान पुनले माओवादीभित्र पनि मन्त्री फेर्न दबाब बढेको बताएका थिए ।

तर, माओवादीभित्र उक्त विषयमा औपचारिक भने छलफल भएको छैन । नेता गणेश शाहका अनुसार मन्त्री फेरबदल गर्नेबारे माओवादीका कुनै पनि बैठकमा प्रस्ताव आएको छैन । प्रदेश र संघको निर्वाचनको मिति नजिकिएको हुँदा माओवादीभित्र सोही विषयमा तयारी चलिरहेको उनले बताएका छन् ।

तर, सोमबार केही सञ्चार माध्यमले स्रोतलाई हवाला दिँदै अर्थमन्त्री फेरबदल गर्न लागेको बताए । अर्थमन्त्री जनार्दन शर्माको कामबाट असन्तुष्ट पार्टी अध्यक्ष पुष्पकमल दाहाल ‘प्रचण्ड’ले राजीनामा मागेको सञ्चारमाध्यमहरुको दाबी छ । आइतबार साँझ प्रचण्ड र जनार्दनबीच भएको भेटलाई जोडेर सञ्चारमाध्यमले उक्त विषयलाई बाहिर ल्याएका थिए ।

तर, प्रचण्ड स्वम्ले अर्थमन्त्री शर्माको राजीनामा मागिएको भनि आएका समाचार मिथ्या भएको प्रष्ट पारेका छन् । उनले उक्त समाचारहरु नियोजित रुपमा आएको पनि बताएका छन् ।

एक अनलाइनसँगको कुराकानीमा अध्यक्ष प्रचण्डले फेरबदल गर्ने अहिले कुनै नीति नभएको स्पष्ट पारे । “अर्थमन्त्री फिर्ता बोलाउने भनेर जेजे हल्ला चलाइएको छ, यो बदनाम गर्न फैलाएको अफवाह र पार्टीविरुद्धको षडयन्त्रबाहेक केही होइन”, एक सञ्चारमाध्यमसँगको कुराकानीमा प्रचण्डले भनेका छन्, “अर्थमन्त्रीले पार्टीको नीति निर्देशनमै काम गरिरहनुभएको छ, अहिले कुनै पनि मन्त्रीलाई फिर्ता बोलाउने पार्टीको नीति छैन ।”