हामी सबैकाे संसारन्यूज

काठमाडौं । ठगी मुद्दामा पक्राउ परेका व्यवसायी इच्छाराज तामाङलाई धरौटीमा रिहा गर्न वकिल र न्यायाधीशबीच २ करोड रुपैयाँको डिल भएको अडिओ सार्वजनिक भएपछि न्यायपरिषद्को आकस्मिक बैठक बोलाइएको छ । कामु प्रधानन्यायाधीश दीपककुमार कार्कीले न्यायपरिषद्को आकस्मिक बैठक बोलाएका हुन् ।

तामाङलाई धरौटीमा रिहा गर्न काठमाडौं जिल्ला अदालतका न्यायाधीश राजकुमार कोइराला र नेपाल बार एसोसिएसनका पूर्व कोषाध्यक्ष रुद्र पोखरेलबीच लेनदेनबारेको अडियो न्युज २४ टेलिभिजनले सार्वजनिक गरेको थियो ।

सार्वजनिक भएको अडियोमा तामाङलाई १० करोडमा छुटाउन प्रस्ताव गरिएको छ र त्यसबापत २ करोड आफूहरुले पाउने अडियो सुन्न सकिन्छ। अधिवक्ता र न्यायाधीशबीच करिब १० मिनेट कुरा भएको छ ।

सिभिल सहकारीका पूर्व अध्यक्ष तामाङलाई ठगी र संगठित अपराध कसूरमा केन्द्रीय अनुसन्धान ब्युरो सीआइबीले ७८ असोज १८ गते पक्राउ गरेको थियो । अहिले तामाङ डिल्ली बजार जेलमा छन् ।