हामी सबैकाे संसारन्यूज

काठमाडौं । गैरआवासीय नेपाली संघ (एनआरएन) ले काठमाडौं महानगरपालिकाको विभिन्न क्षेत्र निर्माणका काममा सहकार्य गरेर अगाडि बढ्ने भएको छ ।

संघको प्रतिनिधि मंडल र काठमाडौ महानगरपालिकाका मेयर बालेन शाहबीच भएको भेटघाट कार्यक्रममा संघले काठमाडौँ महानगरपालिका संग सहकार्य गरी महानगरको स्तरोन्नती, ट्राफिक व्यवस्थापनको लागि ट्राफिक लाइट, आधुनिक सार्वजनिक शौचालय निर्माण लगायतका काममा सहयोग गर्ने बताएको हो ।

संघका कार्यकारी अध्यक्ष कुल आचार्यले ललितपुर महानगरपालिकाको समन्वयमा शंखमुल पार्क बनाएको स्मरण गराउँदै गतवर्ष नै टेण्डर आब्हान गरी बनाउन लागेको सार्वजानिक शौचालय कलंकी सडक विस्तारले जग्गा अधिग्रहण भएपछि स्थगित भएको बताए । आचार्यले यदि काठमाडौं महानगरपालिकाले जग्गा उपलब्ध गराएको खण्डमा एनआरएनएले दुईवटा सार्वजनिक शौचालय बनाउने र उक्त शौचालय व्यवस्थापनको निमित्त आग्रह गरेका थिए ।

साथै फोहोर व्यवस्थापनको निमित्त विभिन्न देशहरूको उच्चस्तरीय प्रविधिको विषय पनि जानकारी गराएका थिए ।

सोहि अवसरमा संघका उपाध्यक्ष महेश कुमार श्रेष्ठले काठमाडौं सिटीलाई ’स्मार्ट सिटी’ बनाउन सहकार्य र समन्वय गर्न गैरआवसीय नेपाली संघ हरदम तयार रहेको बताएका थिए ।

भेटका क्रममा मेयर शाहले काठमाडौंको कला–संस्कृति, सम्पदालाई विश्व सञ्जालमा चिनाउनको निमित्त गैरआवासीय नेपाली संघलाई आग्रह गरेका थिए ।

त्यस्तै ’कुकुर तिहार’ लाई विशेष पर्वको रुपमा विश्वभर मनाउन र त्यो देशको क्यालेन्डरमा उक्त पर्व छपाउन पहल गर्न आग्रह गरेका थिए । गैरआवासीय नेपाली संघले बनाउन लागेको सार्वजनिक शौचालय बनाउन जग्गा उपलब्ध गराउन, व्यवस्थापन गर्न काठमाडौं महानगरपालिका सकारात्मक रहेको बताएका छन् ।

उक्त भेटमा युरोपका क्षेत्रीय संयोजक चिंतामणि सापकोटा, युरोपका युवा संयोजक रमेश काफ्ले, आईसीसी सदस्य प्रदीप न्यौपाने लगायतका अभियन्ताहरुको उपस्थिति रहेको बताइएको छ ।