हामी सबैकाे संसारन्यूज

काठमाडौं । सहरी विकास मन्त्री रामकुमारी झाँक्रीले सर्वोच्च अदालतका कायममुकायम प्रधानन्यायाधीश दीपककुमार कार्कीलाई भेटेकी छिन् । आइतबार प्रधानन्यायाधीश कार्कीको कार्यकक्षमै पुगेर मन्त्री झाँक्रीले कार्कीलाई भेटेकी हुन् ।

सर्वोच्च स्रोतले बताएअनुसार अदालतको आदेशका कारण विकास निर्माणको काम प्रभावित भएको भन्दै झाँक्रीले कामु प्रधानन्यायाधीश कार्कीसँग छलफल गरेकी छिन् । बताइएअनुसार उनले विकास निर्माणको आयोजना, परियोजना आदिको विषयमा अन्तरिम आदेश गरिँदा विकास निर्माणको काम नै प्रभावित हुने गरेको गुनासो गरेकी थिइन् ।

उनले अदालतले विचाराधीन अवस्थामा रहेका मुद्दाहरू छिटो टुंग्याउन पनि आग्रह गरेकी छिन् । छलफलमा कामु प्रधानन्यायाधीश कार्कीले भने ऐन, नियम, कानूनअनुसार अदालतले गर्ने, अदालतले छिटोभन्दा छिटो फैसला गर्न सकोस् भन्ने आफ्नो पनि चासो रहेको जवाफ दिएका थिए ।

मन्त्री झाँक्रीलाई उनी आबद्ध नेकपा (एकीकृत समाजवादी)ले फिर्ता बोलाइसकेको छ । कामु प्रधानन्यायाधीशसँग विकास आयोजनासँग सम्बन्धित मुद्दामा छलफल गरिएको भएपनि उनले केही कानूनी परामर्श पनि लिएको हुनसक्ने बताइएको छ । झाँक्री पार्टीले फिर्ता बोलाएको भएपनि मन्त्री छाड्न अस्वीकार गरिरहेकी छिन् ।