काठमाडौं । नेकपा माओवादी केन्द्रको केन्द्रीय समिति बैठकमा नेतृत्वमाथि व्यंग्य गरिएको छ । आठौं महाधिबेशन सकिएको लामो समयसम्म पनि नेतृत्वले पदाधिकारीको टुंगो लगाउन नसकेको भन्दै त्यस्ता नेतृत्वले देश कसरी बनाउँछ भन्ने व्यग्यं गरिएको हो ।
आइतबारदेखि सुरु भएको केन्द्रको केन्द्रीय समिति बैठकको आज दोश्रोदिन पार्टीका अध्यक्ष पुष्पकमल दाहाल ‘प्रचण्ड’ ले आइतबार प्रस्तुत गरेको १० बुँदे राजनीतिक प्रतिवेदनमाथि छलफल भइरहेको छ । उक्त छलफलकै क्रममा माओवादी नेता सुदन किरातीले नेतृत्वमाथि यस्तो व्यंग्य गरेका हुन् ।
‘चिनियाँ उखान छ आफ्नो घर बनाउन नसक्नेले समाज बनाउन सक्दैन । पार्टी संरचना बनाउन नसक्नेले मुलुक बनाउन सकिँदैन भन्ने सन्देश गयो । पदाधिकारी बनाउन सक्नु भएन भने जनवाद प्रयोग गरौ हामी बनाउँछौ ।’ किरातीले भनेका थिए ।
आइतबारको बैठकमा बागमती प्रदेश प्रमुख सरल सहयात्रीले तीनदिनको र्बैठक पाँचदिन लम्ब्याएर पनि पदाधिकारीको टुंगो लगाउनुपर्ने माग गर्दै पार्टीलाई भद्रगोल अवस्थामा राख्न नहुने बताएका थिए ।
त्यस्तै मधेश प्रदेश इन्चार्ज गणेश साहले पनि मधेश प्रदेशका पदाधिकारीहरुको टुंगो लगाउनुपर्ने माग राखेका थिए । साहले पार्टीले मधेशका ऐजेण्डाबारे छलफल नगरेको भन्दै पार्टीमा नेतृत्व बिहिनता अन्त्य हुनुपर्ने माग राखेका थिए । उनले मधेशमा पार्टी कमजोर भएको विषयमा समेत निमर्म समिक्षा गर्नुपर्ने माग राखेका थिए ।
वि.सं.२०७९ असार २० सोमवार १३:४९ मा प्रकाशित