हामी सबैकाे संसारन्यूज

काठमाडौं । संखुवासभाको मादीमा एकै परिवारका ६ जनाको ज्यान जाने गरी घटना घटाएका ४ अभियुक्तलाई आजीवन कैद सजाय सुनाइएको छ ।

मादी नगरपालिका १ खोलागाउँका एकै पविारका ६ जनाको हत्याको अभियोगमा संलग्न रहेका ४७ वर्षीय खड्गबहादुर कार्की, उनका छोरा २८ वर्षीय हस्तबहादुर कार्की, लोकबहादुर कार्की र उनका बुबा ४९ वर्षीय रणबहादुर कार्कीलाई अजीवन कैदको फैसला सुनाइएको हो ।

जिल्ला अदालत संखुवासभाले सोमबार हत्यामा संलग्न चार जनालाई आजीवन कैद र प्रतिव्यक्ति दुई लाख रुपैयाँका दरले क्षतिपूर्ति तिराउने फैसला गरेको छ भने अर्का १७ वर्षीय नरेश कार्कीलाई १६ वर्ष तीन महिना कैदको फैसला सुनाइएको छ ।

२०७८ भदौ २१ गते बिहान खोलागाउँका ८४ वर्षीया पार्वती कार्की, उनका छोरा ५५ वर्षीय तेजकुमार कार्की, बुहारी ५४ वर्षीया मनमाया कार्की, नातिनी बुहारी ३२ वर्षीया रञ्जना कार्की, पनाति ८ वर्षीय दिपेन कार्की र पनातिनी ५ वर्षीया गोमा कार्कीको हत्या भएको थियो ।

पुरानो रिसइबीका कारण उक्त समूहले २१ गते बिहान साढे ५ बजेतिर खेताला बोलाउन आफ्नो घरमा आएका तेज कुमार कार्की र उनको परिवारको हत्या गरेका थिए ।