हामी सबैकाे संसारन्यूज

काठमाडौं । नेकपा एमालेका नेता विष्णु रिजालले नेपाली राजनीतिमा केही पार्टीहरुले श्रीलंकाका राजापाक्ष–पथतिर लागेको आरोप लगाएका छन् ।

नेपाली राजनीतिमा केही पार्टीभित्र देखिएको परिवारवादले मुुलुक खोक्रो हुने र परिवार मोटाउने र अन्ततः राजनीतिमा राजापाक्षे परिवारकै नियति भोग्नुपर्ने टिप्पणी उनले गरेका छन् ।

‘भाइ, छोरी–ज्वाइँलाई पोलिट्ब्युरो, सांसद, मेयर, छोरालाई स्यानिटरी प्याडको जिम्मा, श्रीमतीलाई व्यापारी डिल गर्ने जिम्मेवारी– नेपाली राजनीतिमा राजापाक्षे–पथकै अनुकरण हो, जसबाट क्रमशः मुुलुक खोक्रो हुन्छ, परिवार मोटाउँछ र अन्ततः राजनीतिमा राजापाक्षे परिवारकै नियति भोग्दछ ।’रिजालले सामाजिक संजालमा लेखेका छन् ।

उनले राजनीतिमा नातावाद, कृपावाद र परिवारवादका कारण मुलुक अन्ततः श्रीलंका बन्ने बताउँदै भनेका छन्– राष्ट्रपति, प्रधानमन्त्री, सभामुख, रक्षामन्त्री– सबै पद परिवारमै राखेको राजापाक्षे परिवारले आज श्रीलंकालाई जहाँ पुर्याएको छ, त्यसैको परिणामस्वरुप राष्ट्रपति भाग्नुपरेको छ । प्रधानमन्त्रीको घरमा जनताले आगो लगाएका छन् । देश पूरै ठप्प छ । कुनैबेला दक्षिण एसियामा सबै मानव विकास सूचकांकमा अघि रहेको श्रीलंका आज टाट पल्टेर संसारसँग भिख मागिरहेको छ ।’