हामी सबैकाे संसारन्यूज

काठमाडौं । केही दिन अघि बाम एकता तथा सहकार्यका बारेमा छलफल जुटेका तत्कालिन नेपाल कम्युनिष्ट पार्टी (नेकपा)का नेताहरु पुनः छलफलमा जुटेका छन् । मंगलबार सिंहदरबारस्थित माओवादी केन्द्रको संसदीय दलको कार्यालयमा नेताहरु छलफलमा जुटेका हुन् ।

माओवादी केन्द्रको संसदीय दलमा भएको छलफलमा माओवादी अध्यक्ष पुष्पकमल दाहाल ‘प्रचण्ड’सहित नेकपा (एकीकृत समाजवादी)का अध्यक्ष माधवकुमार नेपाल, नेता झलनाथ खनाल, नेकपा एकता राष्ट्रिय अभियान पार्टीका संयोजक वामदेव गौतम, माओवादी केन्द्रका नेता नारायणकाजी श्रेष्ठ, वर्षमान पुन सहभागी छन् ।

यसअघि मंगलबार मात्रै माओवादी अध्यक्ष प्रचण्ड र जसपाबाट बाहिरिएका नेता डा. बाबुराम भट्टराईबीच छलफल भएको थियो ।

माओवादी केन्द्रमा बामपन्थीहरुबीच गठबन्धन वा एकता गर्नुपर्ने विषयमा छलफल चलिरहेको छ । यता, एकीकृत समाजवादीले पनि सोही विषयमा नै केन्द्रीत रहेर छलफल चलाईरहेको छ ।

दलहरुबीच मिलेसम्म एकता, नमिलेमा वामपन्थी गठबन्धन बनाउने विषयमा छलफल चलिरहेको बुझिएको छ । दलहरुबीच आम चुनाव अघि नै निर्णय गर्नेगरि छलफल केन्द्रीत देखिन्छ ।