हामी सबैकाे संसारन्यूज

काठमाडौं । जनता समाजवादी पार्टी (जसपा) गोरखाको पुर्नगठनका लागि ९१ सदस्यीय भेला आयोजक समिति गठन गरिएको छ ।

मंगलबार बसेको जसपा गोरखाको बैठकले गोरखामा पार्टी पुर्नगठन गर्ने निर्णय गर्दै अध्यक्ष यानप्रसाद भट्टको संयोजकत्वमा ९१ सदस्यीय भेला आयोजक समिति पनि गठन गरेको हो ।

बैठकले जिल्ला मातहतका सबै निकाय, समितिहरु स्वतः भेला आयोजक समिति तथा निकायमा रुपान्तरण भएको निर्णय समेत गरेको छ ।
गोरखा उक्त पार्टीका संघीय परिषद् अध्यक्ष रहेका डा. बाबुराम भट्टराईको गृहजिल्ला हो । यद्यपी असारको अन्तिम साता वीरगन्जमा भएको अध्यक्ष उपेन्द्र यादव पक्षको भेलाले डा. बाबुराम भट्टराई लगायतका ९ जना कार्यकारीणि सदस्यलाई काराबाही गरिएको घोषणा गरेको थियो ।

पार्टीभित्रै आफुमाथि कारबाही भएपछि कारबाही फुकुवा गर्न माग गर्दै डा. भट्टराईले पार्टी पुर्नगठनका लागि सबैलाई एकजुट हुन अपिल समेत गरेका थिए ।

बुधबार नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ सँग भेटेका डा. बाबुराम भट्टराईले नयाँ पार्टी बनाउने तयारी गरिरहेका छन् । उनका शुभेच्छुकहरुले पुनःकम्युनिष्ट पार्टीमै फर्किन सुझाव दिए पनि डा. भट्टराईले कम्युनिष्ट पार्टीमा नफर्किने तर समाजवादी केन्द्र निर्माणका लागि विभिन्न दलका नेताहरुसँग छलफल गरिरहेको बताउँदै आएका छन् ।