हामी सबैकाे संसारन्यूज

काठमाडौं । प्रमुख प्रतिपक्षी दल नेकपा (एमाले)का अध्यक्ष केपी शर्मा ओलीले प्रतिनिधिसभा र प्रदेश सभाको निर्वाचन सार्ने खतरा रहेको बताएका छन् । बुधबार काठमाडौंमा आयोजितक एमाले बागमती प्रदेशस्तरीय बृहत भेला तथा प्रशिक्षण कार्यक्रमलाई सम्बोधन गर्दै उनले सत्ता गठबन्धनले विभिन्न बहाना बनाएर चुनाव सार्न सक्ने बताए ।

“मंसिरमा संघीय संसद्का लागि निर्वाचन हुनुपर्नेछ, विभिन्न बहाना बनाएर पर सार्ने खतरा छ”, ओलीले भने, “संविधानमाथिको थिचोमिचोले फागुनमा हुनुपर्ने निर्वाचन वैशाखमा हुने स्थिति बन्यो, त्यो पनि नगरेर आगामी चैतमा मात्र गर्ने भनेका थिए, एमालेको नेतृत्वमा भएको राष्ट्रिय प्रयासले गर्दा त्यो सफल भएन ।”

ओलीले निर्वाचन तलमाथि हुन नदिनका लागि लाग्न पार्टीका नेता र कार्यकर्तालाई निर्देशनसमेत दिएका छन् ।

अध्यक्ष ओलीले देशको स्वाधीनता, स्वतन्त्रताको रक्षा, लोकतन्त्रको मूल्य, मान्यतासहित संविधानको रक्षा र कार्यान्वयन गर्नका लागि एमालेको सरकार आउनुपर्ने दाबी गरे । राज्यका अंगहरू आफ्ना ठाउँमा प्रभावकारी र स्वच्छ रुपमा क्रियाशील होऊन् भन्नका लागि पनि एमालेको सरकार आउनुपर्ने उनको भनाई छ ।