Sansar News
काठमाडौं । करको दर हेरफेर प्रकरणमा पूर्वअर्थमन्त्री जनार्दन शर्मामाथि छानबिन गर्न बनेको संसदीय विशेष समितिले छानबिन थालेको दुई साता पुगेको छ । यसबीचमा समितिले पूर्वअर्थमन्त्री शर्मासहित अर्थमन्त्रालयका उच्च अधिकारीहरुसँग बयान लिएको छ । साथै अर्थमन्त्रालयको सीसीटीभी फुटेजबारे अध्ययन पनि गरेको छ ।
नेपाल प्रहरीको विद्युतीय विधि विज्ञान प्रयोगशालाले अर्थमन्त्रालयको सीसीटीभी फुटेजबारेको विवरण सोमबार छानबिन समितिलाई बुझाएको थियो । समितिले मंगलबार प्रहरीको रिपोर्टबारे छलफल गर्ने तयारी गरेको छ ।
समितिको मंगलबार बस्ने बैठकले प्रहरीको रिपोर्ट र आगामी छानबिनबारे निर्णय लिने समितिका एक सदस्यले जानकारी दिएका छन् । तर, हालसम्म समितिले छानबिनमा ठोस प्रगति भने गर्न सकेको छैन ।
प्रहरीको रिपोर्टमा के छ भन्ने उल्लेख नभएपनि छानबिन समितिका कतिपय सदस्यले पूर्वअर्थमन्त्री शर्माको फोन रेकर्ड माग्नु पर्ने बताउन थालेका छन् । जुन विषयमा समितिका सदस्यहरुबीच सहमति जुटेको छैन् । फोन रेकर्ड माग्नुपर्ने भनाई सार्वजनिक भएको हेर्दा छानबिनमा खास प्रगति नभएको बुझ्न सकिन्छ ।
आइतबार मात्रै समितिको बैठकले सिंहदरबारको पूर्वी र दक्षिणी प्रवेशद्वारका सिसिटिभी फुटेज माग गर्ने निर्णय गरेको थियो ।
असार २२ मा गठन भएको छानबिन समितिले असार २८ देखि कार्य थालेको थियो । कार्य थालनीदेखि १० दिनसम्मको समय पाएको समितिलाई समय अपुग भएको भनेपछि संसदले गत असार ५ मा थप एक साताको समय थप गरेको थियो । तर, थपिएको समयमा पनि समितिले छानबिनमा प्रगति गर्न सकेको देखिन्न ।
सम्बन्धित समाचार
करको दर हेरफेर प्रकरण : तथ्य नभेटाएपछि छानबिन समितिलाई थपियो एक साता
वि.सं.२०७९ साउन ९ सोमवार १८:०० मा प्रकाशित
