हामी सबैकाे संसारन्यूज

दाङ । एक युवकलाई बन्धक बनाई ७ लाख रूपैयाँ फिरौती माग गरेको घटनामा संलग्न एक महिलासहित ६ जनालाई प्रहरीले पक्राउ गरेको छ ।

दैलेख चामुन्डाबिन्द्रसैनी नगरपालिका–३ बस्ने २७ वर्षीय युवकलाई बन्धक बनाई फिरौती माग गरेको आरोपमा दाङ बबई गाउँपालिका–३ का ३५ वर्षीय लिलाराम बिक, ३५ वर्षीय मार्सल भन्ने नेप बहादुर घर्ति, तुलसीपुर उपमहानगरपालिका–४ खाद्रेका २५ वर्षीय सकुलाल बिक, कपिलवस्तु शिवराज नगरपालिका–९का २० वर्षीय मनोज थारू, प्युठान गौमुखी गाउँपालिका–७ घर भइ दाङ तुलसीपुर उपमहानगरपालिका–६ हातीखौवा बस्ने २४ वर्षीय जनक कवँर र तुलसीपुर उपमहानगरपालिका–७ बस्ने २६ वर्षीया निर्मला विश्वकर्मा पक्राउ परेका छन् ।

प्रहरीको प्रारम्भिक अनुसन्धानको क्रममा सोमबार राति बुटवल बसपर्कमा दैलेख जाने गाडी खोजी रहेका पीडितलाई निर्मलाले फोन गरी ‘आफन्तको गाडी छ बुटवल पुल्चोकसम्म आउनु डाईभरलाई तपाईको नम्बर दिन्छु’ भनेर बोलाएको केही समयपछि लिलाराम बिक समेत ५ जनाले उनलाई कुटपिट गरी बागमती प्रदेश–०१–२५ च ८७२९ नम्बरको गाडीमा राखी दाङ पुर्याएका थिए ।

उनीहरुले तुलसीपुर उपमहानगरपालिका–५ सल्यान रोडस्थित युवम होटलमा युवकलाई बन्धक बनाई फिरौती रकम ७ लाख मागेका थिए । ईलाका प्रहरी कार्यालय तुलसीपुरबाट खटिएको प्रहरीले पीडितलाई बन्धक बनाई राखेको होटलबाट सकुशल उद्दार गरी घटनामा संलग्न सबैलाई पक्राउ गरेर आवस्यक अनुसन्धान गरिरहेको बताइएको छ ।