Sansar News
काठमाडौं । आफुहरु र सरकारबीच भएको सम्झौता कार्यान्वयन नभएको भन्दै बञ्चरेडाँडा संघर्ष समितिले भदौ १ गतेदेखि उपत्यकाको फोहोर फाल्न नदिने चेतावनी दिएको छ ।
बिहीबार काठमाडौंमा पत्रकार सम्मेलन गरेर उनीहरुले सिसडोल र बञ्चरेडाँडामा फोहोर फाल्न नदिने चेतावनी दिएका हुन् ।
बञ्चरेडाँडा संघर्ष समितिका संयोजक श्रीराम ढुंगानाले सरकार र आफुहरुबीच गत जेठ २७ गते भएको सम्झौता कार्यान्वयन नभएको र त्यसका लागि सरकार र काठमाडौं महानगरपालिकाले कुनै कदम नचालेको आरोपसहित फोहोर फाल्न नदिने घोषणा गरेका हुन् ।
सिसडोल र बञ्चरेडाँडाका बासिन्दाले पटक–पटक धोका खाएको निष्कर्ष समितिले निकालेको छ ।
‘मानबस्तीरहित ल्यान्डफिलसाइट विकास क्षेत्र वा फोहोरमैला प्रदूषणरहित मानवबस्ती विकास क्षेत्रमध्ये सरकारले एउटा मात्रै छान्न पाउने छ ,’ संयोजक ढुंगानाले पत्रकार सम्मेलनमा भने, ‘अब सधैंका लागि फोहोर फाल्न नदिने बाध्यकारी आन्दोलन गरिएको हो ।’
वि.सं.२०७९ साउन १२ बिहीवार १५:२६ मा प्रकाशित
