हामी सबैकाे संसारन्यूज

काठमाडौं । संसदीय समितिले सफाई दिएसँगै जनार्दन शर्मा पुनः अर्थमन्त्रीको रुपमा फर्किएका छन् । उनी राजीनामा दिएको २५ दिनपछि अर्थको जिम्मेवारीमा पुनः आएका हुन् । शर्मा फर्किएसँगै भने तत्कालिन प्रकरणमा मुछिएका र चर्चामा रहेका सचिव तथा सह–सचिवहरुले मन्त्रालय छाड्न सरुवा मागेका छन् ।

प्रधानमन्त्री कार्यालय स्रोतका अनुसार अर्थसचिव मधु मरासिनीले अर्थ छाड्न मुख्यसचिवसँग आग्रह गरिसकेका छन् । उनलाई प्रधानमन्त्री तथा मन्त्रिपरिषद् कार्यालयमा सरुवा गर्ने तयारी भएको बुझिएको छ ।

शर्माले अर्थमन्त्रीबाट राजीनामा नदिएसम्म मन्त्रालय नफर्कने सर्त राखेर बिदामा बसेका मरासिनी शर्माले राजीनामा दिएसँगै २३ असारमा मन्त्रालयमा हाजिर भएका थिए । तर, शर्माको पछिल्लो नियुक्ती पछि उनी पुनः विदा लिएर पोखरा गएका छन् । शर्माको स्वागत कार्यक्रम छल्नलाई उनले यस्तो गरेका हुन् ।

मरासिनीसँगै अर्थमन्त्रालयबाट अन्य दुई सह–सचिवले पनि सरुवा मागेको बुझिएको छ । अर्थमन्त्रीलाई स्वागतका बेला उनीहरुले पनि बिदाको बाहाना बनाएका थिए ।