हामी सबैकाे संसारन्यूज

काठमाडौं । आगामी मंसिर ४ गते हुने प्रदेश र प्रतिनिधिसभा निर्वाचनका लागि बनेको सत्ता गठबन्धनको सिट बाँडफाटका लागि गठित कार्यदलको बैठक आज बस्दैछ ।

आज दिउँसो ३ बजे प्रधानमन्त्री निवास बालुवाटारमा उक्त कार्य दलको पहिलो बैठक बस्न लागेको हो ।

गत साउन २० गते बसेको सत्ता गठबन्धन दलको बैठकले आगामी मंसिर ४ गतेको निर्वाचनमा स्थानीय तहको निर्वाचनमा जस्तै तालमेल गरेर जाने निर्णय गरेको विज्ञप्ति सार्वजनिक गरेको थियो । सोहि बैठकले सिट बाँडफाँटका लागि ११ सदस्यीय कार्यदल समेत गठन गरेको थियो ।

उक्त कार्यदलमा कांग्रेसबाट महामन्त्री गगन थापा, कृष्ण सिटौला र ज्ञानेन्द्रबहादुर कार्की, नेकपा माओवादी केन्द्रबाट वर्षमान पुन र जनार्दन शर्मा, नेकपा एसबाट महासचिव बेदुराम भुसाल र प्रमेश हमाल, जसपाबाट रामसहाय प्रसाद यादव र रकम चेम्जोङ, राष्ट्रिय जनमोर्चाबाट हिमलाल पुरी र आनन्द शर्मा गरी ११ सदस्यीय कार्यदल बनाइएको थियो ।

तालमेलको खाका बनाउन गठित कार्यदलले साउन मसान्तभित्रै सबै निर्वाचन क्षेत्रको तथ्य आकंलन गरी सीट बाँडफाँटको मोडालिटीसहितको सुझाव पेस गर्ने बताइएको थियो ।