हामी सबैकाे संसारन्यूज

काठमाडौं । सत्ता गठबन्धनभित्रका र बाहिरका वाम दलहरुबीच मोर्चा बनाएर एउटै चुनाव चिन्ह लिएर चुनाव लड्ने विषयमा छलफल सुरु भएको छ । निर्वाचन आयोगले साउन ३१ भित्रै चुनावी प्रयोजनका निम्ति दल दर्ताको समय छुट्याएको बेला दलहरुबीच उक्त विषयमा छलफल चलेको हो ।

बिहीबार माओवादी केन्द्रका अध्यक्ष पुष्पकमल दाहाल ‘प्रचण्ड’, नेकपा एकता राष्ट्रिय अभियानका संयोजक वामदेव गौतम र नेपाल समाजवादी पार्टीका अध्यक्ष डा। बाबुराम भटराईबीच बेग्ला–बेग्लै छलफल भएको थियो । नेताहरुबीच न्यूनतम मोर्चाको अवधारणा बनाउने र चुनाव चिन्ह एउटै बनाएर जानुपर्ने छलफल भएको बुझिएको छ ।

बाबुराम भट्टराई निकट नेता विश्वदीप पाण्डेका अनुसार मोर्चा बनाएर एउटै चुनाव चिन्हबाट लड्ने विषयमा मोटामोटी सहमति भएको छ । “मोर्चा बनाएर एउटै चुनाव चिह्नमा लड्नेबारे छलफल भएको छ, हामी सबै सहमत छौं”, उनले भनेका छन्, “छिट्टै टुंगाएर जाने सहमति भएको छ ।”

नेताहरुबीच छिट्टै माधव नेपालसहितका नेताहरुसँग छलफल गर्ने निर्णय पनि भएको उनले बताए । गौतम र भट्टराईले माओवादी केन्द्रको चुनाव चिन्हलाई साझा बनाउन सकिने प्रस्ताव प्रचण्डसँग गरेको बुझिएको छ ।

दिल्ली भ्रमणबाट फर्किए लगत्तै माओवादी अध्यक्ष प्रचण्डले समाजवादी मोर्चा बनाउने प्रस्ताव दलहरुसँग राखेका थिए । तर, जसपा र एकीकृत समाजवादीभित्रको खटपटका कारण उक्त विषयमा घनिभूत छलफल हुन सकेको थिएन ।