हामी सबैकाे संसारन्यूज

काठमाडौं । नेपाल समाजवादी पार्टीका अध्यक्ष डा. बाबुराम भट्टराई गोरखा २ बाट प्रतिनिधिसभा सदस्यका लागि सर्वसम्मत उम्मेदवारमा सिफारिस भएका छन् ।

शनिबार गोरखामा बसेको पार्टीको विस्तारित बैठकले पार्टी अध्यक्ष भट्टराईलाई गोरखा २ बाट सर्वसम्मत उम्मेदवार सिफारिस गरेको हो ।

डा भट्टराईको पार्टी र नेकपा (माओवादी केन्द्र) बीच भएको सहमति अनुसार डा. भट्टराई माओवादी केन्द्रकै चुनाव चिन्ह्रबाट चुनाव लड्ने भएका हुन् । जिल्ला कमिटीले उनको नाम सिफारिस गरेको भए पनि यसबारेमा माओवादी केन्द्रसँग छलफल गरेका छैनन् ।

डा भट्टराईले यसअघि गोरखा २ बाट चुनाव लड्ने बताउँदै आएका छन् भने नेकपा माओवादी केन्द्र गोरखाले भने क्षेत्र नं २ बाट पार्टीका बरिष्ठ उपाध्यक्ष नारायणकाजी श्रेष्ठको नाम सिफारिस गरिसकेको छ ।

यी हुन् सिफारिसमा परेका अन्य उम्मेदवार
त्यसैगरी समाजवादी पार्टीले प्रतिनिधि सभा क्षेत्र नम्बर १ का लागि जिल्ला अध्यक्ष यानप्रसाद भट्ट र विद्यार्थी नेता रूपनारायण श्रेष्ठलाई उम्मेदवार सिफारिस गरेको छ ।

त्यस्तै क्षेत्र नम्बर १ को प्रदेश सभा क्षेत्र (क) मा गोपालबाबु श्रेष्ठ, ज्योति कोइराला र कुमार गुरूङ तथा क्षेत्र नम्बर १ को (ख) तर्फ राजेन्द्र पराजुलीलाई उम्मेदवारको रुपमा सिफारिस गरेको छ ।

त्यसैगरी क्षेत्र नम्बर २ प्रदेश सभा क्षेत्र (क) मा पूर्वसभासद ज्ञानेन्द्र कुमाल, दुर्गा भट्टराई र उपेन्द्र देवकोटा तथा क्षेत्र ख का लागि रमेश पोखरेल र धनमाया लामा उम्मेदवार सिफारिस भएका छन् ।