हामी सबैकाे संसारन्यूज

काठमाडौं । सरकारले चालु आर्थिक वर्षको बजेटमार्फत विभिन्न वस्तुहरुमा लगाएको करका दरहरु हेरफेर गरेको छ । बिहीबार राजपत्रमा सूचना प्रकाशित गर्दै सरकारले दस्तुर, शुल्क, महशुल तथा करको दर हेरफेर गरिएको जनाएको हो ।

चालु आर्थिक वर्षको बजेटमा सरकारले कच्चा पदार्थ आयात गरेर तयार गरिने फलामको डण्डि, नेपालमा तयार गरिने सेनेटरी प्याडको कच्चा पदार्थमा करको दर बृद्धि गरेको थियो । करका दरहरु बृद्धि भएपछि सरोकारवालाहरुले बिरोध जनाएका थिए ।

सरकारले चालु आर्थिक वर्षको बजेटमा ८ मिलिमिटर भन्दा सानो गोलाई भएको फलामे डण्डिमा १० प्रतिशत भन्सार महशुल निर्धारण गरेको थियो । जसलाई घटाएर ५ प्रतिशत कायम गरिएको छ । त्यस्तै, अन्तशुल्कअन्तर्गतका माल वस्तु पैठारी गर्दा लाग्ने अन्तशुल्क पनि घटाएर ३५०० बाट २५०० मा झारिएको छ ।

सरकारले सेनेटरी प्याड निर्माण गर्ने कच्चा पदार्थ आयात गर्दा लाग्ने अन्तशुल्क हटाएको छ भने वनस्पति घ्यू, तेल, सूर्यमुखि तेलको कच्चा पदार्थमा लाग्ने भन्सार महशुल ९० प्रतिशत छुट हुने व्यवस्था गरेको छ । यस अघि ५० प्रतिशत मात्र छुट हुने व्यवस्था थियो ।