हामी सबैकाे संसारन्यूज

काठमाडौं । माओवादी केन्द्रका अध्यक्ष पुष्पकमल दाहाल ‘प्रचण्ड’को चुनावी क्षेत्र चिवतन–३ मै माओवादी कमजोर भएको छ । माओवादीको सोही क्षेत्रका थुप्रै नेता तथा कार्यकर्ता एमालेमा प्रवेश गरेका छन् । बिहीबार एक कार्यक्रमका बीच माओवादी केन्द्रीय सदस्यसमेत रहेका चितवन सह–इन्चार्ज यमबहादुर परियारसहितको समूह एमालेमा प्रवेश गरेको हो ।

एमालेका अध्यक्ष केपी शर्मा ओलीको हातबाट टीका लगाएर नेताहरु एमाले प्रवेश गरेका हुन् । प्रवेश गरेका नेता परियार प्रचण्डकै चुनावी क्षेत्रका नेता हुन् । उनी एमाले र माओवादी एकता भएर बनेको नेकपाका चितवन अध्यक्षको जिम्मेवारीमा थिए । परियार झण्डै १२ वर्षभन्दा माओवादीको चितवन अध्यक्षको जिम्मेवारीमा थिए ।

परियारसँगै माओवादीको भरतपुर महानगरपालिका सहइञ्चार्ज अञ्जन तिमिल्सिना, बागमती प्रदेश परिषद सदस्य पिताम्बर पोखरेल, कालिका नगर कमिटी उपाध्यक्ष तुलबहादुर बिक, जिल्ला सदस्य लावण्यराज शर्मा, वडा नं। १६ का वडाध्यक्ष नारायण अधिकारी, वडा नं. १५ का वडाध्यक्ष आकाश थापा, माडी नगरपालिका ७ देवेन्द्रपुरका गिरीधारी सुवेदीलगायतका नेता कार्यकर्ता पनि एमाले प्रवेश गरेका छन् ।

प्रचण्ड चितवन–३ बाट प्रतिनिधिसभा सदस्यमा उठ्ने तयारीमा छन् । तर, माओवादीभित्रकै विग्रहले उनलाई थप कमजोर बनाउने सम्भावना छ ।