हामी सबैकाे संसारन्यूज

काठमाडौं । पार्टीका अध्यक्ष कमल थापासँग असन्तुष्ट रहेका राप्रपा नेपालका केन्द्रीय पदाधिकारीहरु माओवादी केन्द्रका नेता पुष्पकमल दाहाल ‘प्रचण्ड’लाई भेट्न खुमलटार पुगेका छन् ।

पार्टीका अध्यक्ष थापाले मकवानपुर १ बाट एमालेको चुनाव चिन्ह लिएर निर्वाचन् लड्न लागेपछि असन्तुष्ट भएका राप्रपा नेपालका उपाध्यक्ष श्याम तिमल्सिना, महामन्त्री केशव श्रेष्ठ, सहमहामन्त्री दमन बस्नेत, कोषाध्यक्ष ज्ञानेन्द्र कार्की र प्रवक्ता सुरेश आचार्यले खुमलटार पुगेर प्रचण्डलाई भेटेका हुन् ।

उनीहरु र प्रचण्डबीच झण्डै एकघण्टा छलफल भएको थियो । छलफलमा उनीहरुले अहिले माओवादी केन्द्रमा प्रवेश गर्ने नभएर गठबन्धनका उम्मेदवारलाई सघाउने विषयमा प्रतिबद्धता गरेको छलफलमा सहभागी एक नेताले बताए । पार्टीका अध्यक्ष थापाले आफु अन्य दलको चुनाव चिन्ह लिएर निर्वाचनमा जाने तर अन्य नेतालाई पार्टीकै चुनाव चिन्हमा लड्न गरेको आग्रहप्रति असन्तुष्ट व्यक्त गरेका छन् ।

भेटमा प्रचण्डले पार्टी–पार्टी बीचको विचार र सिद्धान्त फरक भएपनि राष्ट्रियताको विषयमा आफुहरुबीच कुरा मिल्ने बताउँदै विगतमा पनि राजा विरेन्द्रसँग कुरा गर्न धिरेन्द्रमार्फत् गएको बताएका थिए ।

अध्यक्ष थापाले मकवानपुरको क्षेत्र नं १ बाट एमालेको चुनाव चिन्ह सुर्यबाट निर्वाचन लड्न उम्मेदवारी दर्ता गराएका छन् ।
गतवर्ष मंसिरमा सम्पन्न राप्रपाको एकताको महाधिबेशनमा राजेन्द्र लिङदेनसँग पराजित भएपछि थापाले राप्रपा नेपाल ब्युँताएका थिए । राप्रपा नेपालको चुनाव चिन्ह तिर रहेको छ ।