हामी सबैकाे संसारन्यूज

काठमाडौं । कैलाली घटनाका दोषी रेशम चौधरीसहितलाई जेलमुक्त गर्ने गरी अध्यादेश स्वीकृत गरेपछि सरकारको चौतर्फी आलोचना भएको छ ।

यस विषयमा स्पष्टीकरण दिँदै संचारमन्त्री तथा सरकारका प्रवक्ता ज्ञानेन्द्र बहादुर कार्कीले सरकारले हिंसात्मक क्रियाकलापमा संलग्नलाई राजनीतिको मूलधारमा ल्याउन अध्यादेश ल्याउन लागिएको बताएका छन् ।

मन्त्रिपरिषद् बैठकले गरेका निर्णयहरु सार्वजनिक गर्न सोमबार मन्त्रालयमा आयोजित पत्रकार सम्मेलनमा मन्त्री कार्कीले भने–‘आन्तरिक एकताका साथ सहज वातावरणमा सबैलाई काम गर्न दिने मनशायका साथ मुलुकको राजनीतिक प्रणालीसँग असहमत रही हिंसात्मक क्रियाकलापमा संलग्न राजनीतिक दल वा समूहलाई शान्तिपूर्ण राजनीतिको मूलधारमा ल्याउने उदेश्यका साथ यो अध्यादेश हामीले सम्माननीय राष्ट्रपतिमा सिफारिस गरेका छौं ।’

मन्त्री कार्कीले विगतका सरकारले पनि यस्तो प्रकृतिका अध्यादेशहरु ल्याएको बताउँदै मुलुकलाई योगदान गर्न चाहने सबैलाई सहज वातावरण बनाउन सरकारले अध्यादेश ल्याउन लागेको जनाउदै अहिलेको आवस्यकतालाई ध्यानमा राखेर ल्याइएको अध्यादेश मन्त्रिपरिषदले राष्ट्रपति समक्ष सिफारिस गरेको बताए ।