Sansar News
काठमाडौं । राष्ट्रिय स्वतन्त्र पार्टीका सभापति तथा नवनिर्वाचित सांसद रवि लामिछानेको सांसद पद खारेजीको माग गर्दै सर्वोच्चमा रिट परेको छ ।
मंसीर ४ मा सम्पन्न प्रतिनिधिसभा र प्रदेश सभाको निर्वाचनमा चितवन क्षेत्र नं २ बाट प्रतिनिधिसभा सदस्यमा निर्वाचित भएका लामिछानेको सांसद पद खारेजीको माग गर्दै सिन्धुली हाल काठमाडौंमा बस्दै आएका युवराज पौडेल ‘सफल’ ले सर्वोच्चमा रिट हालेका हुन् ।
पौडेलले दायर गरेको रिटमा लामिछानेको सांसदपदसँगै राष्ट्रिय स्वतन्त्र पार्टीको सभापति पद समेत खारेजीको माग गरिएको छ ।
‘मतदान गर्ने, उम्मेदवार बन्ने र राजनैतिक दल खोल्ने अधिकार केवल नेपाली नागरिकलाई मात्रै प्रदान गरिएकोले विपक्षी रवि लामिछानेको राष्ट्रिय स्वतन्त्र पार्टीको सभापति र सदस्यता गैरकानूनी घोषणा गरी पाऊँ’, पौडेलले हालेको रिटमा भनिएको छ, ’सो हैसियतमा प्राप्त गरिएको सम्पूर्ण लाभ अर्थात् मतदाता भएर गरिएको मतदान, निर्वाचनमा भएको उम्मेदवारी र त्यस्तो उम्मेदवारी आधारमा प्राप्त सांसद पद (प्रतिनिधि सभा सदस्य) समेत उत्प्रेषणको आदेशले बदर गरी पाऊँ ।’
यस्तो छ रिट निवेदनको पूर्णपाठ
वि.सं.२०७९ मंसिर २८ बुधवार १६:३८ मा प्रकाशित
