हामी सबैकाे संसारन्यूज

काठमाडौं । नेपाल बुद्धिजीवी परिषदले शेरबहादुर देउवा नेतृत्वको सरकारले राजनीतिक लाभका लागि समग्र राजनीतिलाई नै अपराधिकरण गर्ने गरी अध्यादेश ल्याएको भन्दै त्यसको भत्र्सना गरेको छ ।

परिषद्का अध्यक्ष डा. दिनेशचन्द्र देवकोटाले एक विज्ञप्ति जारी गर्दै देउवा सरकारले आफ्नो राजनीतिक लाभका लागि सक्रमणकालीन अवस्थामा आफ्नै देशको र अन्तराष्ट्रिय जगतका फौजदारी कानुन र अदालतका फैसलालाई समेत चुनौती दिँदै ‘केही मुद्दा फिर्ता लिन सकिने’ अध्यादेश ल्याएको भन्दै त्यसको भत्र्सना गरेको हो ।

‘अध्यादेश ल्याएर त्यसका माध्यमबाट राजनीतिक गठजोडको लाभ लिन खोज्ने गठबन्धनमा सामेल दलहरु र त्यसका नेता नेपाली कांग्रेसका शेरबहादुर देउवा नेतृत्वको यो अन्तरिम सरकारको जति भत्र्सना गरे पनि पुग्दैन ।’ डा. देवकोटाद्धारा जारी विज्ञप्तिमा भनिएको छ ।

परिषदले यस्ता राष्ट्रिय महत्वका विषयमा सरकारले सर्वदलीय बैठक वा सबै पक्षका विज्ञ तथा कानुन व्यवसायीसँग परामर्शै नगरी लोकतन्त्रको खिल्ली उडाउँदै सत्ता लोलुपको उद्धेश्यका साथ अपराधलाई राजनीतिकरण गर्न र समग्र राजनीतिकलाई नै अपराधिकरण गर्नतर्फ हौस्याउने गरी आएको अध्यादेश जनता र लोकतन्त्रको विरोधि रहेको आरोप लगाएको छ ।