काठमाडौं । माओवादी केन्द्र नेतृत्वको सरकारको समर्थन गरेको जनता समाजवादी पार्टी सरकारमा सहभागि हुने विषयमा भने अनिर्णित देखिएको छ । जसपाले कार्यकारिणी बैठकबाट मात्रै सरकारमा सहभागिताको विषय टुंग्याउने भनेको छ । तर, सरकारमा सहभागिताबारे जसपाको रणनीति भने बेग्लै देखिन्छ ।
जसपाले केन्द्रमा भन्दा मधेश प्रदेशमा आफ्नो दाबीलाई अगाडि सारेको छ । उसको रणनीति मधेश प्रदेशको नेतृत्व हत्याउने छ । जसमा सहमति नभई सरकारमा नजाने आन्तरिक निर्णय जसपाले गरेको छ ।
जसपाका प्रवक्ता मनिष सुमनले बताएअनुसार केन्द्रीय कार्यकारिणी समिति र राजनीतिक समितिको बैठकपश्चात मात्रै सरकारमा जाने/नजाने निर्णय हुनेछ । उनले मधेशको नेतृत्वमा आफ्नो पार्टीले दाबी नछाड्ने पनि स्पष्ट पारेका छन् ।
“हामीले सरकारमा जाने/नजाने विषयमा निर्णय लिएका छैनौं, केन्द्रीय कार्यकारिणी र राजनीतिक समितिको बैठक पछि मात्रै सरकारमा सहभागिताबारे निर्णय गर्नेछौं”, उनले भनेका छन्, “तर, हाम्रो मागलाई सम्बोधन गर्नुपर्छ, मधेशको नेतृत्वमा हाम्रो स्वभाविक दाबी छ ।”
मधेश जसपाको आधारभूमि हो । तर, मधेशको नेतृत्वमा जसपासँगै सिके राउत नेतृत्वको जनमत पार्टीले पनि दाबी गरेको छ । तर, यी दुबै दलको पोजिसन भने त्यति बलियो छैन ।
१०७ सदस्यीय प्रदेशसभामा जसपाको १६ सिट छ भने जनमतको १३ सिट छ । तर, लोसपा, जसपाभन्दा मधेशमा एमाले ठूलो शक्तिको रुपमा छ । एमालेसँग एक्लै २३ सिट छ । जहाँ माओवादी र एकीकृत समाजवादी क्रमशः ८ र ७ सिटमा छन् । यस्तोमा बहुमत बहुमत पुर्याउन गठबन्धनका सबै दलहरु मिल्नुपर्ने हुन्छ । तर, जसपा र जनमतको अडानले मधेशको नेतृत्वमा भने सकस पर्ने देखिएको छ ।
एमाले र माओवादीभित्र प्रदेश नेतृत्वबारे मोटामोटी सहमति भएको छ । दुई दलले मधेशको विषय भने निर्णय लिएका छैनन् ।
वि.सं.२०७९ पुस १४ बिहीवार १२:२० मा प्रकाशित
