हामी सबैकाे संसारन्यूज

काठमाडौं । उपप्रधान, भौतिक पूर्वाधार तथा यातायात मन्त्री नारायणकाजी श्रेष्ठले एकमहिना भित्रै देशैभरीका सडकका खाल्डा पुर्न निर्देशन दिएका छन् ।

सोमबार मन्त्रालयमा आयोजित सडक विभागको ब्रिफिङ कार्यक्रममा उपप्रधानमन्त्री श्रेष्ठले निर्धारित समयमा गुणस्तरीय पूर्वाधार निर्माण गर्नुको विकल्प नभएको भन्दै यसका लागि राजनीतिज्ञ तथा कर्मचारीले आत्मलोचनासहित शून्य सहनशीलताको नीति अवलम्बन गर्नुपर्ने बताएका थिए ।

उपप्रधानमन्त्री श्रेष्ठका स्वकीय सचिव विजय गौतमका अनुसार समस्याग्रस्त आयोजनाको छुट्टै सूची बनाएर कामकारबाही अगाडि बढाउन समेत उपप्रधानमन्त्रीले निर्देशन दिएका छन् ।

चारघण्टा लामो उक्त ब्रिफिङमा उपप्रधानमन्त्री श्रेष्ठले कर्मचारीहरुले जागिरे मानसिकताबाट माथि उठेर देशको विकास निर्माणका लागि आफुलाई रुपान्तरण गर्न जरुरी रहेको बताउँदै सम्पूर्ण आयोजना अवस्था र भावि योजना पाँचदिन भित्र पेश गर्न निर्देशन दिएको समेत स्वकीय सचिव गौतमले बताएका छन् ।

पुस १० गते उपप्रधान, भौतिक पूर्वाधार तथा यातायात मन्त्रीमा नियुक्त भएका श्रेष्ठले सोमबार बिहान एकान्तकुना र स्वयम्भूस्थित सानो भर्याङमा रहेको यातायात व्यवस्था कार्यालयको अनुगमनमा गएका थिए । अनुगमनका क्रममा उनले यातायतामा अहिले देखिएका समस्या सामाधान र सेवाग्राहीलाई छिटो र सहज सेवा दिन के गर्नुपर्छ भन्ने हस्तक्षेपकारी कार्ययोजना बनाउन लागिएको बताएका थिए ।