Sansar News
काठमाडौं । गण्डकी प्रदेशको मुख्यमन्त्रीमा नेकपा एमालेको प्रदेश संसदीय दलका नेता खगराज अधिकारीले दाबी पेश गरेका छन् ।
मुख्यमन्त्रीमा दाबी पेश गर्न प्रदेश प्रमुखको आव्हानसँगै आइतबारै ३२ सांसदको हस्ताक्षरसहित तयारी अवस्थामा रहेका अधिकारीले आज प्रदेश प्रमुख पृथ्वीमान गुरुङसमक्ष ३३ सांसदको हस्ताक्षरसहित दाबी पेश गरेका हुन् ।
अधिकारीलाई आफ्नो पार्टीका २२, माओवादी केन्द्रका ८ र राष्ट्रिय प्रजातन्त्र पार्टीका २ गरी ३२ प्रदेश सांसदको समर्थन रहेको छ । साथै अधिकारीलाई स्वतन्त्र सांसद दीपक मनाङेले पनि अन्तिममा समर्थन गरेका छन् । त्यसपछि अधिकारीको समर्थनमा ३३ सांसद पुगेका छन् ।
एमाले स्थायी कमिटी सदस्य तथा संगठन विभाग प्रमुख समेत रहेका खगराज मंसीर ४ मा सम्पन्न प्रदेशसभाको निर्वाचनमा कास्की १(१) बाट विजयी भएका थिए ।
आइतबार बेलुका सत्ता साझेदार दलबीच भएको बैठकमा प्रदेशको बाँडफँट टुंग्याइएको थियो । सो बैठकको निर्णय अनुसार नेकपा एमालेले गण्डकी प्रदेश, लुम्बिनी प्रदेश र प्रदेश १ मा पूरै कार्यकाल मुख्मन्त्री चलाउन पाउने भएको छ ।
वि.सं.२०७९ पुस २५ सोमवार १५:०२ मा प्रकाशित
