काठमाडौं । नेपाली राष्ट्रिय क्रिकेट टोलीका पूर्वकप्तान सन्दीप लामिछाने शुक्रबार थुनामुक्त हुँदैछन् ।
उच्च अदालत पाटनले लामिछानेलाई २० लाख धरौटीमा छाड्न आदेश दिएको हो ।
नाबालिग बलात्कारको आरोपमा गत २० असोजमा त्रिभुवन अन्तराष्ट्रिय विमानस्थलबाटै पक्राउ परेका लामिछानेले जिल्ला अदालत काठमाडौंले थुनामै राखेर बलात्कारसम्बन्धी मुद्दामा कारबाही अघि बढाउने भन्दै गरेको आदेशविरूद्ध उच्च अदालत पाटनमा निवेदन दिएका थिए ।
सोहि निवेदनमा बुधबार सुनुवाई गर्दै न्यायाधीश ध्रुवराज नन्द र रमेश ढकालको संयुक्त इजलासले लामिछानेलाई २० लाख धरौटीमा छाड्न आदेश दिएको हो ।
त्यसैगरी अदालतले लामिछानेलाई उपत्यका छोड्न नपाउने तथा विदेश जान रोक लगाएको छ भने पीडितसँग सम्पर्क नगर्न समेत आदेश दिएको छ । उनले पीडितलाई सम्पर्क गरेको पुष्टि भएमा पुनः थुनामा पठाइने बताइएको छ ।
असोजमा पक्राउ परेका लामिछानेलाई गत कात्तिक १८ गते काठमाडौं जिल्ला अदालतले दुवै पक्षको बहपछि थुनामा पठाउन आदेश दिएको थियो ।
वि.सं.२०७९ पुस २८ बिहीवार २०:३६ मा प्रकाशित