हामी सबैकाे संसारन्यूज

मुगु । मुगुका संचारकर्मी स्वर्गीय सुमन मल्लकी पत्नि गंगादेविलाई आर्थिक सहयोग गरिएको छ ।

नेपाल पत्रकार महांसघ मुगु र रारा छायाँनाथ मिडिया प्रालिले सुमनको सम्झनामा गमगढीमा आयोजना गरेको तीनदिने मैत्रीपूर्ण फुटबल प्रतियोगिताबाट संकलन भएको २४ हजार सुमनकी पत्नि गंगादेविलाई हस्तान्तरण गरिएको हो ।

मैत्रीपूर्ण फुटबल प्रतियोगितामा सहभागी खेलाडीहरुको टिम संकलन भएको २४ हजार रकम छायाँनाथ रारा नगरपालिकाका प्रमुख बिष्णु कुमार भामको हातबाट गंगादेविलाई हस्तातरण गरिएको नेपाल पत्रकार महासंघ मुगु शाखाका अध्यक्ष नृपेन्द्रबहादुर मल्लले जनाए ।

सुमनको पारिवारिक आर्थिक अबस्था नाजुक भएको हुँदा थप सहयोग पुगोस् भन्ने उद्वेश्यले खेलाडीबाट उठेको रकम गंगादेविलाई दिएइको अध्यक्ष मल्लको भनाई छ ।

सुमनकी ७५ बषिय बृद्धा आमा मुगादेविले आँखाबाट आँसु झार्दै कार्यक्रमको उदघाटन गरेकी थिइन् । सुमनकी पत्नि गंगादेवि, जेठी छोरी एलिना, माइली छोरी सपना र कान्छा छोरा श्रीस पनि खेल मैदानमा उपस्थित थिए ।

गमगढीस्थित सिद्धार्थ बोडिङ स्कुलले सुमनका दुई छोरी र एक छोरालाई सहुलियतमा पठनपाठन गराइ राखेको छ ।

उक्त स्कुलमा सुमनकी जेठीछोरी एलिना कक्षा ६, माइली छोरी सपना कक्षा ३ र छोरा श्रीस युकेजीमा अध्ययनरत भएपनि भबिष्यमा उच्च शिक्षा कसरी पढाउने भन्ने बारेमा गंगादेविलाई चिन्ता छ । उनलाई छोराछोरी पढाउन हुर्काउन मात्र चिन्ता नभएर गाँस बास कपासका लागि पनि उत्तिकै कठिन परिस्थितिसँग जुधेर जुझ्नु परेको छ ।

४१ बर्षको कलिलो उमेरमै सुगर र रक्तचापका कारण संचारकर्मी सुमनको मृत्यु भएको दुई बर्षपछि पत्रकार महासंघ र रारा छायाँनाथ मिडिया प्रालिले गमगढीमा पहिलोपटक मैत्रीपूर्ण फुटबल आयोजना गरेका थिए ।

सुमनको सम्झनामा आयोजित मैत्रीपूर्ण फुटबल प्रतियोगिता समापन कार्यक्रममा सहभागी खेलाडी टिम सहयोगी निकाय, रेफ्रि लगायत ब्यक्तिहरुलाई प्रमाणपत्र प्रदान गरिएको नेपाल पत्रकार महासंघले जनाएको छ । आगामी बर्षमा सुमन स्मृति मैत्रीपूर्ण फुटबल आयोजना गर्ने लक्ष्य पत्रकार महासंघले राखेको छ ।