Sansar News
काठमाडौं । नेकपा एमालेबाट राष्ट्रपतिको उम्मेदवार रहेका पूर्वसभामुख सुवास नेम्वाङ राष्ट्रिय स्वतन्त्र पार्टीको कार्यालयमा पुगेका छन् ।
यहि फागुन २५ गते हुने राष्ट्रपतिको निर्वाचनका लागि उम्मेदवारी मनोनयन दर्ता गराएका नेम्वाङले रास्वपाको बसुन्धरास्थित कार्यालयमा पुगेर राष्ट्रपतिमा आफुलाई सघाउन अनुरोध गरेका हुन् ।
केही समय अगाडि नेकपा एकीकृत समाजवादीका अध्यक्ष माधवकुमार नेपाललाई भेटेका नेम्वाङ, उपमहासचिव पृथ्वीसुब्बा गुरुङ र सचिव योगेश भट्टराईसहितको टिम रास्वपाको कार्यालयमा पुगेको हो ।
यसअघि सातदलीय गठबन्धनमा रहेर सरकारमै सहभागी भएको रास्वपा यतिबेला भने सरकार बाहिर रहेको छ । यद्यपी पुष १० गते सरकारलाई दिएको समर्थन भने फिर्ता लिएको छैन । रास्वपाले राष्ट्रपतिमा कसलाई सघाउने भन्ने विषयमा पनि निर्णय लिइसकेको छैन ।
वि.सं.२०७९ फागुन १८ बिहीवार १५:२६ मा प्रकाशित
