हामी सबैकाे संसारन्यूज

काठमाडौं । राष्ट्रिय सभा अध्यक्ष गणेशप्रसाद तिमिल्सिना संसद विघटनको पक्षमा उभिएका छन् । संसद्‍ विघटन गर्ने कुरा संसारभरको अभ्यास भएको भन्दै उनले यसलाई नौलो मान्न नमिल्ने बताए । तत्कालिन प्रधानमन्त्री केपी शर्मा ओलीले संसद विघटन गरेको घटनालाई लक्षित गर्दै उनले यस्तो टिप्पणी गरेका हुन् ।

तिमिल्सिनाले संसद विघटन गर्न नपाउने व्यवस्था राख्दा लफडा भइरहेको बताए । “जनप्रतिनिधिमूलक संस्था ठीकै ढंगले जाँदा कहीँ केही भयो भने सरकारले संसद विघटन गर्ने दुनियाँको जहाँको अभ्यास हो, नेपालमा त्यो भइरहेको थियो”, पारिवारिक निजी वन संघ नेपालको ९औं स्थापना दिवसको अवसरमा आयोजित कार्यक्रममा बोल्दै उनले भनेका छन्, “संविधान बनाउँदा पटकपटक विघटन भयो भनेर विघटन नै नगर्ने बनाउँ भनेर लेख्दा अहिले लफडा भइरहेको छ ।”

अध्यक्ष तिमिल्सिनाले गठबन्धन संस्कृति पनि विरोध गरेका छन् । उनले गठबन्धन संस्कृतिले राजनीतिलाई दिशाहिन बनाएको उनको आरोप छ ।

“१२/१५ वटा पार्टी मिलेका छन्, नचले पनि घस्रेर पाँच वर्ष त केही गर्नु हुँदैन भन्ने छ, अहिले विघटन नगर्ने कुरा सबैभन्दा ठूलो क्रान्तिकारी, परिवर्तनगामी हुने भनेको छ, संविधानले त्यही भनेपछि त त्यही भन्नुपर्छ”, उनले भनेका छन्, “कस्तो विडम्बना, भागबण्डा गरेको छ, पार्टी फुटायो, एउटा पार्टी फुटाउन अध्यादेश ल्याएको छ, अर्को पार्टी जोड्न अध्यादेश ल्यायो, भागबण्डा गर्‍यो, मन्त्री बाँड्यो, त्यस्तो गरेपछि विघटन नगराएर बचाउनुपर्ने ।”

संसद विघटन गर्ने व्यवस्था हुँदा नयाँ जनमत प्राप्त हुने र राजनीतिक अस्थिरता पनि अन्त्य हुने उनको भनाई छ । उनले भनेका छन्, “ बरु चुनाव गर्‍यो, अर्को कोही नयाँ त आउँथ्यो, नयाँ आएर बहुमत ल्याउँथ्यो, त्यस्तो भएन । हामी आफ्ना बानी सुधार नगर्ने, नियम, ऐन, कानूनलाई दोष दिने । परिवर्तन गर्ने भन्ने, परिवर्तनको चक्र घुमाएर मात्रै हामी कहाँ पुग्छौँ ।”