हामी सबैकाे संसारन्यूज

काठमाडौं । राष्ट्रपतिमा नेपाली कांग्रेसका उम्मेदवार रामचन्द्र पौडेल निर्वाचित भएका छन् ।

बिहीबार संसद भवन बानेश्वरमा सम्पन्न निर्वाचनमा पौडेल ३३ हजार ८०२ मतभारसहित राष्ट्रपतिमा विजयी भएका हुन् ।

उनले प्रतिनिधि सभाका २१४ र प्रदेश सभाका ३५२ सांसदको मत प्राप्त गरेका थिए ।

आठ दलीय गठबन्धनबाट राष्ट्रपतिको उम्मेदवार बनेका पौडेललाई नेपाली कांग्रेस, नेकपा माओवादी केन्द्र, जनता समाजवादी पार्टी, नेकपा एकीकृत समाजवादी, राष्ट्रिय स्वतन्त्र पार्टी,लोकतान्त्रिक समाजवादी पार्टी, जनमत पार्टी, नागरिक उन्मुक्ति पार्टी, राष्ट्रिय जनमोर्चाको सांसदहरुले मत दिएका थिए ।

त्यसैगरी पौडेलका प्रतिश्प्रधी रहेका नेकपा एमालेका उपाध्यक्ष सुवासचन्द्र नेम्वाङले १५ हजार ५१८ मतभार प्राप्त गरेका छन् । उनलाई प्रतिनिधि सभाका ९६ र प्रदेश सभाका १६२ सांसदले मत दिएका थिए । यद्यपी निर्वाचन आयोगले यसको औपचारिक जानकारी भने दिएको छैन ।

निर्वाचनमा राष्ट्रिय प्रजातन्त्र पार्टी र नेमकिपाका सांसदले मतदान गरेका थिएनन् । रास्वपाले अन्तिम समयमा रामचन्द्र पौडेललाई मत दिने निर्णय गरेको थियो ।

संविधानमा नेपालमा एक राष्ट्रपति रहने र राष्ट्रपतिले नेपालको राष्ट्रिय एकताको प्रवद्र्धन गर्ने उल्लेख छ । संविधानको पालना र संरक्षण गर्नु राष्ट्रपतिको प्रमुख कर्तव्य हुनेछ ।

नेपालमा विसं २०६२\६३ को आन्दोलनको उपलब्धिका रुपमा मुलुकमा गणतन्त्र स्थापना भएसँगै राष्ट्रपति प्रणालीको अभ्यास सुरु भएको हो । राष्ट्रपतिको पदावधि निर्वाचित भएको मितिले पाँच वर्ष हुने र दुई पटक राष्ट्रपति निर्वाचित भइसकेको व्यक्ति निर्वाचनमा पुनः उम्मेदवार हुन नसक्ने संविधानमा उल्लेख छ ।