काठमाडौं । सेयर बजारमा देखिएको निरन्तरको पहिरो थामिएको छ । साताको तेस्रो कारोबार दिन २६ अंकको उतार चढावसँगै १.८५ अंकले बृद्धि भएर नेप्से १९५३.०६ अंकमा अडिएको छ ।
मंगलबार कारोबार रकम भने यसअघिको तुलनामा केही घट्यो । मंगलबार एक अर्ब १३ करोडको कारोबार भयो । यसअघि सोमबार एक अर्ब १६ करोड बढीको कारोबार भएको थियो ।
मंगलबार कारोबारमा आएका २१४ कम्पनीमध्ये १२६ कम्पनीको मूल्यमा केही बढोत्तरी भयो भने ७८ कम्पनीको मूल्यमा गिरावट आएको छ । यस्तै, १० कम्पनीको मूल्य स्थिर रहेको छ ।
युनिक नेपाल लघुवित्तको मूल्यमा १० प्रतिशतले बढ्यो भने सुभम पावर र सुपर मादिमा पनि ९ प्रतिशतभन्दा बढीको बृद्धि भयो ।
मंगलबार एनआइसी एसिया बैंक, नबिल बैंक, शिवम सिमेन्ट र हिमालयन डिस्टीलरी कम्पनीको सबैभन्दा धेरै कारोबार भएको छ ।
