हामी सबैकाे संसारन्यूज

काठमाडौं । बैंक तथा वित्तीय संस्थाहरुले चौथो त्रैमासको पहिलो महिनाको व्याजदर सार्बजनिक गरेका छन् । उनीहरुले सार्बजनिक गरेको आधारदर औसतमा १०.५९ प्रतिशत रहेको छ । बैंकहरुको आधारदरअनुसार कर्जाको व्याज निर्धारण हुन्छ । अहिले सार्बजनिक भएको व्याजदर भने जेठ महिनादेखि लागू हुनेछ । बैंक तथा वित्तीय संस्थाहरुले आधार दरमा २ देखि ५ प्रतिशतसम्म प्रिमियम जोडेर कर्जाको व्याजदर निधारण गर्ने गर्दछन् ।

राष्ट्रिय वाणिज्य बैंकको व्याजदर सबैभन्दा सस्तो

बैंकहरुले सार्वजनिक गरेको विवरणअनुसार नेपाल सरकारको पूर्ण स्वामित्वमा रहेको बैंक राष्ट्रिय वाणिज्य बैंकको व्याज सबैभन्दा सस्तो हुने देखिएको छ भने सबैभन्दा महँगो व्याज सनराइज बैंकको हुने देखिन्छ । व्यवसाय गर्नेहरुले राष्ट्रिय वाणिज्य बैंकबाट कर्जा लिँदा न्यूनतम १०.६० प्रतिशदेखि अधिकतम १३.६० प्रतिशतसम्ममा पाउन सक्ने देखिन्छ ।

त्यस्तै, सबैभन्दा महंगो आधारदर भएको सनराइज बैंकबाट कर्जा लिँदा न्यूनतम १३.५२ प्रतिशतदेखि अधिकतम १६.५२ प्रतिशतमा कर्जा पाउन सक्ने बैंकले सार्बजनिक गरेको विवरणमा देखिन्छ ।

विवरणहरु अनुसार ८ देखि ९ प्रतिशतका बिच आधार दर भएको वैंक राष्ट्रिय बाणिज्य बैंक मात्र रहेको छ । त्यस्तै ९ देखि १० प्रतिशतका बिच आधार दर भएका बैंकहरु चारवटा रहेका छन् । तिनीहरु स्ट्याण्डर्ड चाटर्ड बैंक, नेपाल बैंक, एभरेष्ट बैंक, र नविल बैंक हुन् ।

१० देखि ११ प्रतिशतका बिच आधार दर भएका बैंकहरुको संख्या ८ रहेको छ । तिनीहरु नेपाल इन्भेष्टमेन्ट मेगा बैंक, कृषि विकास बैंक, एनआइसि एसिया बैंक, सिद्धार्थ बैंक, एनएमबि बैंक, ग्लोबल आईएमई बैंक, सानिमा बैंक, कुमारी बैंक लगायत रहेका छन् । ११ र १२ प्रतिशतका बिच आधारदर रहेका बैंकहरु पनि ८ वटा नै रहेका छन् । तिनीहरु हिमालयन बैंक, नेपाल एसबिआई बैंक, प्रभु बैंक, लक्ष्मी बैंक, प्राईम बैंक, सिटिजन्स बैंक, माछापुच्छ्रे बैंक, सनराइज बैंकलगायत रहेका छन् । अघिल्लो महिना बैंकहरुको औसत आधारदर १०.७३ प्रतिशत रहेको थियो ।