हामी सबैकाे संसारन्यूज

काठमाडौं । एनआइसि एसिया बैंकले सुर्खेतको वीरेन्द्रनगरस्थित श्री नेपाल राष्ट्रिय प्राथमिक विद्यालयलाई पानी ट्यांकी तथा मोटर सहयोग गरेको छ । बैंकले आफ्नो संस्थागत सामाजिक उत्तरदायित्व अन्तर्गत सो सहयोग गरेको हो ।

बैंकले वीरेन्द्रनगर–१ धारापानीस्थित विद्यालयमा स्वच्छ खानेपानीको व्यवस्थापन, सहज शैक्षिक वातावरण तथा स्वास्थ्य अनुकूल वातावरण सिर्जना गर्ने उद्देश्यसहित पानी ट्यांकी तथा मोटर जडान गरेको जनाएको छ ।

१६७ भन्दा बढी विद्यार्थी अध्ययनरत उक्त विद्यालयमा आयोजित कार्यक्रममा बैंकका कर्णाली सर्कल हेड जीवन शाहीले विद्यालय व्यवस्थापन समितिकी अध्यक्ष सुशिला सुनारलाई पानी ट्यांकी तथा मोटर हस्तान्तरण गरेका थिए । कार्यक्रम २०८३ जेठ ८ गते सम्पन्न भएको हो ।

कार्यक्रममा वीरेन्द्रनगर नगरपालिका वडा नम्बर–१ का वडा अध्यक्ष दिनेश खत्री, विद्यालय व्यवस्थापन समितिका प्रतिनिधि, शिक्षक–शिक्षिका, विद्यार्थी तथा बैंकका कर्मचारीहरुको उपस्थिति रहेको थियो ।

बैंकले उपलब्ध गराएको सहयोगले विद्यालयमा स्वच्छ खानेपानीको पहुँच अझ प्रभावकारी हुनुका साथै विद्यार्थी र शिक्षकहरुको स्वास्थ्य तथा पठनपाठन वातावरणमा सकारात्मक प्रभाव पर्ने विश्वास लिएको जनाएको छ ।