हामी सबैकाे संसारन्यूज

काठमाडौं । राष्ट्रिय स्वतन्त्र पार्टी (रास्वपा) की नेतृ तथा सांसद डा. तोसिमा कार्कीले भ्रष्टाचारमा कहाँ लिंग जोडिएको हुन्छ भनेर प्रश्न गरेकी छन् ।

डा. कार्कीले मंगलबारको प्रतिनिधि सभाको बैठकमा बोल्दै कांग्रेस नेतृ आरजु राणा देउवाप्रति इगित गर्दै यस्तो भनेकी हुन् ।
‘एक महिला माननीय सांसदज्यूले भन्नु भयो, टेप काण्डको अनुसन्धान महिला बिद्रोह भयो, महिला हिंसा भयो, मलाई उत्तर दिनुपर्यो, भ्रष्टाचारमा कहाँनेर लिंग जोडिएको हुन्छ,’ डा. कार्कीले भनिन्, ‘भ्रष्टाचार मात्र नभएर यहाँ चिनारी फेरेर राष्ट्रघात भएको र अपराध भएको छ कारबाही हुनुपर्छ ।’

केही दिनअघि नक्कली भुटानी शरणार्थी प्रकरणमा टेप काण्डको अनुसन्धान माग गर्दा देउवाले महिलामाथि हिंसा भएको बताएकी थिइन् ।

के भनेकी थिइन् देउवाले ?
‘भ्रष्टाचारको कुरामा हामी साच्चिकै कति सिरियस छौं भन्ने मेरो ठुलो प्रश्न छ । म नभएको दिनमा मेरो नाम इंगित गरेर अनेकथरी प्रश्नहरु उठेको छ । आज पनि उठेको मैले पाएको छ,’ नेतृ राणाले भनेकी थिइन्, ‘एउटा नारीले आफ्नो हैसियतमा राजनीति गरेको यो देशमा सैह्रय हुँदो रहेनछ । पुरुषले भनेको ठाउँमा मात्र नारी बस्नु पर्ने । उनीहरुले बोलेको भाष्य बोल्नुपर्ने, उनीहरुले मात्र हामीले एक्सरसाइज गर्नुपर्ने, त्यो भन्दा अलिकति पब्लिक लाइफमा आयो भने पुरुषहरुलाई असहै्रय हुने परिस्थिति बनेको छ । यो नेपालमा मात्र नभएर अन्तरष्ट्रियरुपमा छ । त्यसको विरोधमा हामीले संविधान लेखेको हो । जसले जति क्रिटिसाइज गरेपनि मैले विराएको छैन म डराउँदिन ।’