हामी सबैकाे संसारन्यूज

काठमाडौं । नेपाल विज्ञापन संघ (आन)ले सरकारद्वारा जारी गर्न लागेको विज्ञापन नीतिको विरोधमा कार्यक्रम गरेको छ ।
बुधबार भएको कार्यक्रममा हाल सरकारले प्रस्ताव गरेको विज्ञापनमा एकद्वार नीतिको विषयमा आनले बिरोध जनाउँदै श्रृंखलावद्ध विरोध कार्यक्रमको घोषणा गरेको छ । कार्यक्रम घोषणा गर्दै आनका अध्यक्ष सोमप्रसाद धितालले सो विरोध कार्यक्रम विज्ञापनमा एकद्वार नीतिको विरुद्ध हो भन्दै विज्ञापन बोर्डको गलत कृयाकलापको विरुद्धमा रहेको बताएका थिए ।
साथै कार्यक्रममा अध्यक्ष धितालले देश आर्थिक रुपमा कमजोर रहेको अवस्थामा देशमा ठूल–ठूला मुद्दालाई समाधान गर्नुको सट्टा केही अमुक व्यक्ति र स्वार्थ समूहलाई खुशी बनाउने हेतुले ल्याइन लागेको विज्ञापन नीतिले कसैको पनि हित नहुने बताए ।

यसैगरी निवर्तमान अध्यक्ष रविन्द्रकुमार रिजाल (शशी) ले नेपाल खुला बजार अर्थतन्त्रमा प्रवेश गरिसकेको अवस्थामा कसैको पनि स्वतन्त्र रुपमा गरिने व्यापार व्यवसायलाई हाम्रो जस्तो सानो अर्थतन्त्र भएको मुलुकले तानाशाही रुपमा अंकुश लगाउन नहुने बताए । उनले शाही शासन कालमा ल्याइएको विज्ञापनमा एकद्वार नीतिलाई लोकतान्त्रिक सरकारले जस्ताको त्यस्तै कार्यान्वयनमा ल्याउन खोज्नु लोकतन्त्रकै उपहास भएको बताए ।

बिरोध कार्यक्रममा अध्यक्ष धितालले संचार जगत, विज्ञापनदाता र विज्ञापन व्यवसायीलाई ऐक्यबद्धताको लागि आव्हान गरे । वुधबारको विरोध आन्दोलन विज्ञापन बोर्डको कार्यालय बबरमहलमा पुगेर ताला लगाउने काम गरेको थियो । ‘सरकारी विज्ञापनमा एकद्वार खारेज गर, संचार माध्यमको दररेट कायम गर, विज्ञापन बोर्ड विज्ञापन बाँडने अखडा हैन, विज्ञापनमा पारदर्शिता लागु गर, विज्ञापन आचार संहितालागू गर, विज्ञापन बोर्डमा संघको प्रतिनिधित्व सुनिश्चित गर’, लगायतका नारा जुलुसमा सहभागीहरुले लगाएका थिए ।

नेपाल विज्ञापन संघले विज्ञापन बोर्ड मार्फत विज्ञापन बाँड्ने एकद्वार नीति लागु गर्ने, विज्ञापन वितरणमा एजेन्सीको भूमिका नराख्ने, बोर्डमा संघको संस्थागत प्रतिनिधित्व नहुने, विषयमा बर्तमान सरकारका सञ्चार तथा सूचना प्रविधि मन्त्री, अर्थमन्त्री र गृहमन्त्रीलाई भेटेर ज्ञापनपत्र समेत बुझाएको थियो ।