हामी सबैकाे संसारन्यूज

काठमाडौं । नेकपा एमालेका अध्यक्ष केपी शर्मा ओलीले भ्रष्टाचार प्रकरणमा जोसुकैको नाम आए पनि उसलाई कारबाहीको दायरामा ल्याउनुपर्ने बताएका छन् ।

ललितपुरको च्यासलस्थित पार्टी कार्यालयमा आजदेखि सुरु भएको पार्टीको केन्द्रीय कमिटीको बैठकलाई सम्बोधन गर्दै ओलीले भ्रष्टाचार प्रकरणमा उच्च पदस्थ व्यक्तिहरु र एमालेकै नेताहरुको नाम समेत आइरहेको भन्दै जोसुकै भएपनि कारबाही हुनुपर्ने बताए ।

अध्यक्ष ओलीले यदि एमालेमाथि प्रतिशोध राखेर फसाउने प्रयास भएको अवस्थामा आफुहरु चुप लागेर नबस्ने बताउँदै पूर्वाग्रही भएर निर्दोषलाई फसाउने काम हुन नहुने बताए ।

‘नक्कली भुटानी शरणार्थी प्रकरणमा अहिले विभिन्न व्यक्तिहरूको नाम आइरहेको छ, हाम्रै साथीहरूको नाम पनि परेको छ, यसमा हामी प्रष्ट हुनु जरुरी छ कि भ्रष्टाचार गर्ने कार्यमा जो सुकैको नाम आवोस्, यदि दोषी छ भने उसलाई कारबाही हुनुपर्छ । तर जबसम्म मान्छे दोषी ठहर हुदैन, त्यतिबेलासम्म हामीले त्यस्तो आरोप लागेको व्यक्तिलाई दोषी करार गरिहाल्नु हुँदैन ।’ सम्बोधनका क्रममा उनले भने ।

उनले छलछाम गरेर राज्यको ढुकुटी खल्तीमा राख्ने काममा जोकोही संलग्न भएपनि त्यसको प्रतिरोध गर्नुपर्ने बताउँदै अहिलेको अवस्थामा कसैले भ्रष्टाचार र भ्रष्टाचारीका विरुद्धमा बोलेमा त्यसको मुख थुन्ने प्रयास भइरहेको समेत बताए ।
’अमरेशकुमार सिंहले संसद्मा भ्रष्टाचारको विरोध के गरेका थिए अहिले उनीविरुद्व अख्तियारमा उजुरी नै परिसकेको छ । कसैले बोल्यो कि उसको मुख थुनिहाल्ने प्रवृत्ति देखिएको छ । अनि कसैले प्रतिशोधमा उजुरी दियो भने हामी पत्याइहाल्छौँ, हामी कहाँ त्यो खालको परपीडक मानसिकता भएको समाज पनि छ ।’

एमाले केन्द्रीय कमिटीको चौथो बैठक आजदेखि, यी हुन् छलफलका १० कार्यसूची