हामी सबैकाे संसारन्यूज

काठमाडौं । रोमानिया र कम्बोडिया पठाइदिन्छु भन्दै रकम ठगी गर्ने पक्राउ परेका छन् ।

उक्त अभियोगमा बागलुङको बागलुङ नगरपालिका–७ घर भई काठमाडौं टोखा नगरपालिका–९ जाल्पाचोक बस्ने ३४ वर्षीय विशाल विश्वकर्मालाई आइतबार प्रहरीले पक्राउ गरेको हो ।

प्रहरीले विक समेतले ८ जनालाई वैदेशिक रोजगारीको लागि रोमानिया पठाई प्रतिष्ठित कम्पनीहरुमा १ लाख रूपैयाँ भन्दा बढी तलबमा काम लगाइदिन्छु भन्दै प्रलोभनमा पारी पीडितहरूबाट पटकपटक गरी १८ लाख रुपैयाँ ठगी गरेकोले आरोपमा प्रहरीले लाजिम्पाटबाट पक्राउ गरेको हो ।

त्यसैगरी कम्बोडिया पठाइदिन्छु भन्दै रकम ठगी गरेको अभियोगमा सिन्धुपाल्चोक पाँचपोखरी थाङपाल गाउँपालिका–१ घर भई काठमाडौं गोकर्णेश्वर नगरपालिका–३ माकलबारी बस्ने २९ वर्षीय सिद्धार्थ तामाङ पक्राउ परेका छन् ।

तामाङ समेतले २ जनालाई वैदेशिक रोजगारीको लागि कम्बोडिया पठाई क्यासिनोमा १ लाख रूपैयाँ भन्दा बढी तलबमा काम लगाइदिन्छु भन्दै प्रलोभनमा पारी पीडितहरूबाट पटकपटक गरी १६ लाख रुपैयाँ ठगी गरेकोले पक्राउ गरिएको प्रहरीले जनाएको छ ।

उनीहरुलाई थप अनुसन्धान तथा कारवाहीको लागि वैदेशिक रोजगार विभाग बुद्धनगर काठमाडौं पठाइएको प्रहरीले जनाएको छ ।