काठमाडौं । प्रधानमन्त्री पुष्पकमल दाहाल ‘प्रचण्ड’ ले टिकापुर घटनामा संलग्न रहेको आरोपमा जन्मकैदको सजाय भोगिरहेका नागरिक उन्मुक्ति पार्टीका संस्थापक रेशमलाल चौधरीका बारेमा छिट्टै टुंगोमा पुग्ने बताएका छन् ।
बिहीबार संसदमा भएको प्रधानमन्त्रीसँग प्रश्नोत्तरका क्रममा नागरिक उन्मुक्ति पार्टीका सांसद गंगाराम चौधरीले सोधेको प्रश्नमा प्रधानमन्त्री प्रचण्डले उक्त विषयमा आफुहरु गम्भीर रहेको र छिट्टै टुंगोमा पुग्ने बताए ।
‘हामीले यसअघि पनि रेशम चौधरीको विषयमा अध्यादेश ल्याएर भएपनि उहाँलाई छुटाउने प्रयास हामीले गरेकै हो,’ उनले भने, ‘अदालतबाट जे फैसला भएपनि छिटो फैसला होस् भन्नका निम्ति हामीले सबैतिर कुनै न कुनै रुपमा आवाज उठाएकै हो । र, अहिले टुंगिएको छ । यो विषयलाई कसरी समाधान गर्ने भन्ने विषयमा हामी निकै गम्भीर छौं । मलाई विश्वास छ हामी छिट्टै एउटा टुंगोमा पुग्ने छौं ।’
त्यस्तै चौधरीले २०७२ को टिकापुर घटनामा विषयमा लाल आयोगले बनाएको प्रतिवेदन सार्वजनिक गर्न माग गर्दै त्यसलाई सार्वजनिक नगर्नु के बाध्यता छ भनेर गरेको प्रश्नमा प्रधानमन्त्रीले सरकार यो प्रतिवेदन सार्वजनिक गर्ने पक्षमा रहेको बताए ।
‘म प्रधाामन्त्री हुँदा नै यो आयोग गठन भएको हुनाले त्यसमा भएका कानुनी र व्यवहारिक जटिलतालाई फुकाएर मात्रै प्रतिवेदन सार्वजनिक गर्न सकिन्छ ।’ प्रधानमन्त्रीले भने ।
उनले राजनीतिक आन्दोलनका कारण जेल जीवन वितारइरहेका बन्दीहरुका सम्बन्धमा सरकारको संसदमा विधेयक प्रस्तुत भइसकेको र छिट्टै निष्कर्षमा पुग्ने बताए ।
‘थरुहट आन्दोलनसँग सम्बन्धीत मात्र होइन, मधेश आन्दोलन लगायत अन्य आन्दोलनसँग सम्बन्धीत बन्दीहरुको रिहाई पनि उक्त विधेयकमा रहेको जानकारी गराउदछु,’ उनले भने, ‘त्यो विधेयकको बाटोबाट बन्दी रिहा गर्ने बाटोमा जानेछौं ।’
