हामी सबैकाे संसारन्यूज

काठमाडौं । नक्कली भुटानी शरणार्थी प्रकरणमा मुख्य नाम जोडिएका व्यक्तिविरुद्ध नै अभियोग दर्ता नहुने देखिएको छ । अनुसन्धान अन्तिम चरणमा पुग्दै गर्दा पनि घटनामा सिधै नाम मुछिएका मुख्य व्यक्तिलाई नै छानबिनको दायरामा ल्याइएको छैन ।

नक्कली भुटानी शरणार्थी प्रकरणको विधिवत् सुरुवात एमाले उपाध्यक्ष रामबहादुर थापा ‘बादल’ गृहमन्त्री हुँदा उनको मन्त्रीस्तरीय निर्णयबाट गठन भएको कार्यदलसँगै भएको देखिन्छ । तत्कालिन गृहमन्त्री बादलले शरणार्थी समस्या समाधानको नाममा ६ बुँदे कार्ययोजना बनाउँदै २०७६ जेठ ३० मा कार्यदल गठन गरेका थिए । बालकृष्ण पन्थीको नेतृत्वमा गठित कार्यदलमा गणेश केसी र शाखा अधिकृत दीपक न्यौपाने थिए । राष्ट्रसंघीय नियोगले २०१६ मै सम्पन्न गरिसकेको काममा कार्यदल गठन गर्दै बादलले नक्कली शरणार्थी बनाउने खेलको विधिवत् सुरुवात गरेका थिए ।

नक्कली शरणार्थी बनाउने उक्त खेलमा तत्कालिन गृहसचिव तथा हाल अख्तियार दुरुपयोग अनुसन्धान आयोगका प्रमुख प्रेम राई सुरुदेखि नै संलग्न रहेको देखिन्छ । कार्यदल बनाउने बादलको प्रस्ताव नै राईको सहमतिसँगै अघि बढेको पाइन्छ ।

कान्तिपुर दैनिक नामक सञ्चार माध्यमसँगको अन्तरवार्ता (२०८० वैशाख ३१)मा पनि राईले कार्यदल निर्माणदेखि आफ्नो संलग्नता रहेको कुरा छोपेका छैनन् । उनले घटनामा पक्राउ परेका विभिन्न आरोपितसँग पटक–पटक भेटघाट भएको स्वीकार गरेका छन् ।

प्रहरी हिरासतमा रहेका सानु भण्डारी र केशव दुलाललगायतले पनि बयानमा तत्कालिन गृहसचिव राईलाई सोझै नगद बुझाएको दाबी गरेका छन् । राईको गाडीको डिक्कीमा दुई करोड ३० लाख रुपैयाँ राखिदिएको बयान उनीहरुले दिएका छन् । उनीहरुले उक्त भिडियो प्रहरीलाई बुझाएको पनि तथ्य खुलेको छ ।

तर, प्रहरीले तत्कालिन गृहमन्त्री बादल र गृहसचिव राईलाई अनुसन्धानको घेरामै ल्याएको छैन । प्रहरीले तत्कालिन गृहमन्त्री बादलका छोरा र उनका सुरक्षा सल्लाहकारलाई अनुसन्धानको घेरामा ल्याएको छ तर, बादल र तत्कालिन गृहसचिव राई भने अनुसन्धानमा तानिएका छैनन् ।

यता, कांग्रेस सभापति शेरबहादुर देउवा पत्नि आरजु राणा र बालकृष्ण खाँणकी पत्नि मञ्जु खाँणलाई पनि प्रहरीले अनुसन्धानको घेरामा ल्याएको छैन । विभिन्न सञ्चारमाध्यममार्फत राणा र खाँण जोडिएको अडियो बाहिरिएको छ । घटनामा पक्राउ परेका आरोपितले पनि दुईको नाम लिएको विषय बाहिरिएको छ । तर, राणा र खाँणमाथि पनि अनुसन्धान हुने देखिएको छैन ।

पति पक्राउ परेसँगै मञ्जु खाँण अहिले कांग्रेसको सम्पर्कमा पनि छैनिन् भने राणाले भने आफुमाथि लगाइएको आरोप मित्थ्या भन्दै सार्वजनिकरुपमा बयान दिइरहेकी छिन् । घटनाक्रमलाई हेर्दा राणा र खाँणको संलग्नता सुरुदेखि नै देखिन्छ । तर, प्रहरीले अनुसन्धानको घेरामा ल्याउने आँटसम्म देखाएको छैन ।

प्रश्नमा नियमित भेटवार्ता

एक अर्काको कटु आलोचना गर्ने प्रमुख दलका शीर्ष नेताहरु नक्कली शरणार्थी प्रकरण सतहमा आइरहँदा नियमित भेटवार्तामा देखिए । प्रधानमन्त्री एवम् माओवादी केन्द्रका अध्यक्ष पुष्पकमल दाहाल प्रचण्ड, कांग्रेस सभापति शेरबहादुर देउवा र एमाले अध्यक्ष केपी शर्मा ओली किन तारान्तार भेटवार्तामा जोडिए ? धेरैले सन्देहपूर्ण रुपमा हेरेका छन् ।

नेताहरुले भेटवार्तालाई संसद सञ्चालनको विषयमा केन्द्रीत भएको बताएको भएपनि सतहमा देखिएको घटना र नेताहरुको भेटवार्ता संगतपूर्ण देखिँदैन । तीन शीर्ष नेताहरुको छलफलमा गृहमन्त्री नारायणकाजी श्रेष्ठसमेत संलग्न भएको कारण नक्कली शरणार्थी प्रकरण आफुहरु अनुकुल बनाउन खोजिएको त होइन ? प्रश्न उब्जिन्छ । धेरैको प्रश्न छ– कतै राजनीतिक लेनदेनको मुद्दा त बनाइन्न ?

याे पनि…

बादल किन तानिएनन् छानबिनमा ?