हामी सबैकाे संसारन्यूज

काठमाडौं । विभिन्न सिलसिलामा विदेशमा रहेका पाँच नेपालीले विभिन्न दुर्घटनामा परेर ज्यान गुमाएका छन् ।

जेठको पहिलो सातामा जापानमा २, अष्ट्रेलियामा २ र पोर्चुगलमा १ गरी पाँच नेपालीले ज्यान गुमाएका हुन् ।

श्रोतका अनुसार सवारी दुर्घटनामा परि जापान र अष्ट्रेलियामा ४ नेपालीले ज्यान गुमाएका छन् भने पोर्चुगलमा सुतेकै अवस्थामा एक नेपाली युवाको मृत्यु भएको छ ।

जापानमा दुई विद्यार्थीको मृत्यु
जापानमा रोकिराखेको बसलाई ट्रकले ठक्कर दिँदा दुई नेपाली युवाको मृत्यु भएको छ ।

विद्यार्थीको रुपमा जापानमा अध्ययन गरिरहेका काभ्रे भुम्लु गाउँपालिका वडा नं ९ का २२ वर्षीय नवराज तामाङ र ओखलढुंगा चिशंखुगढी गाउँपालिका वडा नम्बर २ का २७ वर्षीय युवराज थापाले ज्यान गुमाएका हुन् ।

जापानको मियाग प्रान्तको कुरीहारास्थित तोहोकु एक्सप्रेस वेमा मंगलबार रोकिराखेको बसमा ट्रकले ठक्कर तामाङ र थापाको ज्यान गएको त्यहाँको समाचार संस्था जापान टाइम्सले जनाएको छ ।

बसमा समस्या देखिएपछि चालकलाई लाइट देखाएर बनाउन सघाइरहेका उनीहरुलाई ट्रकले ठक्कर दिएको थियो । उक्त दुर्घटनामा बस चालकको समेत मृत्यु भएको थियो ।

पारीवारीक श्रोतका अनुसार युवराज १२ कक्षा सकेर थप अध्ययनका लागि गतवर्ष जेठमा जापान गएका थिए भने काभ्रेका नवराज गत कात्तिकमा मात्रै जापान गएका थिए । उनीहरु दुवैको शब नेपाल ल्याउनका लागि पहल भइरहेको बताइएको छ ।

अष्ट्रेलियामा दम्पत्तिको मृत्यु
अष्ट्रेलियामा रहेका एक नेपाली दम्पत्तिले पनि सडक दुर्घटनामा ज्यान गुमाएका छन् ।
रुपन्देही सियारी गाउँपालिका वडा नं ४ का ३३ वर्षीय सन्तोष अधिकारी र २४ वर्षीया प्रतिमा अधिकारीले कार दुर्घटनामा ज्यान गुमाएका हुन् ।
अष्ट्रेलियाको मेलवर्नमा अध्ययनरत उनीहरुको गत सोमबार कामबाट फर्किदै गर्दा विपरित दिशातर्फबाट तिब्र गतिमा आइरहेको कारले अधिकारी दम्पत्तिको कारलाई ठक्कर दिँदा दुवैको घटनास्थलमै मृत्यु भएको पारिवारीक श्रोतले जनाएको छ ।
अध्ययनसँगै मेलवर्नमै एज्डकेयरमा कार्यरत दुवै दम्पत्तिको शब नेपाल ल्याउने तयारी भइरहेको बताइएको छ ।

पोर्चुगलमा सुतेकै अवस्थामा मृत्यु
पोर्चुगलमा कार्यरत एक नेपाली युवाको सुतेकै अवस्थामा मृत्यु भएको छ ।
वैदेशिक रोजगारीको सिलसिलामा आठ महिनाअघि मात्र पोर्चुगल पुगेका बाँकेको खजुरा गाउँपालिका–१ चन्द्रनगरका ३३ वर्षीय गणेशमान साराङकोटीको गत शुक्रबार सुतेकै अवस्थामा निधन भएको हो ।

गैरआवासीय नेपाली सङ्घ पोर्चुगलका अध्यक्ष रविन अधिकारीका अनुसार साराङकोटीको पोर्तीमाउस्थित आफ्नै कोठामा सुतेकै अवस्थामा निधन भएको हो । बिहीबार राति कामबाट आएर सुतेका उनी शुक्रबार बिहान ओछ्यानमै मृतावस्थामा भेटिएको अध्यक्ष अधिकारीले बताएका छन् ।

पोर्तीमाउस्थित एक होटलमा कार्यरत उनी विगत आठ वर्षदेखि घर नफर्किएको र रोजगारीकै सिलसिलामा दुबई–माल्टा हुँदै आठ महिनाअघि पोर्चुगल पुगेका थिए । उनको शव पोर्तीमाउस्थित अस्पतालको शवगृहमा राखिएको छ ।

परिवारको आग्रहमा उनको शव नेपाल ल्याउने तयारी भइरहेकोले आर्थिक सहयोग गर्न पोर्चुगलवासी नेपालीमा अनुरोध गरिएको छ ।