हामी सबैकाे संसारन्यूज

काठमाडौं । नेकपा एमालेका अध्यक्ष केपी शर्मा ओलीका स्वकीय सचिव राजेश बज्राचार्यले नक्कली भुटानी शरणार्थी प्रकरणमा आफ्नो नाम आएकोप्रति आपत्ति जनाएका छन् ।

उक्त प्रकरणका अभियुक्त केशव दुलालले बयानका क्रममा ओलीका स्वकीय सचिव वज्राचार्यलाई १ करोड बुझाएको बयान दिएपछि बज्राचार्यले यस विषयमा प्रष्टीकरण दिँदै दुलाललाई आफुले नचिनेको र चिन्दै नचिनेका व्यक्तिबाट आफ्नो नाम पोल्न लगाएको प्रति गम्भीर ध्यानाकर्षण भएको बताएका छन् ।

उनले नक्कली भुटानी शरणार्थी प्रकरणमा अभियुक्त केशव दुलालको बयानको हवाला दिंदै विभिन्न सञ्चार माध्यमले आफ्नो नाम उल्लेख गरेर समाचार सम्प्रेषण गरेकोप्रति गम्भीर ध्यानाकर्षण भएको बताएका हुन् ।

‘अभियुक्त केशव दुलालसँग मेरो चिनजान छैन । चिनजान नै नभएको व्यक्तिले मसँग सरोकार नै नभएको र मलाई थाहै नभएको विषयमा किन मेरो नाम पोले र किन पोल्न लगाइयो, त्यसको कारण पनि मैले बुझ्न सकेको छैन,’ सामाजिक संजालमार्फत् प्रष्टीकरण दिँदै उनले भनेका छन्, ‘नक्कली भुटानी शरणार्थी बनाएर विदेश पठाउने कुरा मलाई थाहा भएको विषय पनि होइन र मैले बुझेको विषय पनि होइन । मैले नचिनेको व्यक्तिले दिएको र दिन लगाइएको बयानका आधारमा मेरो चरित्रहत्या हुनेगरी समाचार सम्प्रेषण नगरिदिनुहुन म सबै सञ्चार माध्यमहरुलाई हार्दिक अनुरोध गर्दछु ।’