हामी सबैकाे संसारन्यूज

काठमाडौं । सरकारले तमोर जलविद्युत आयोजना अघि बढाउने जिम्मा लिएको चिनियाँ कम्पनीलाई स्पष्टीकरण सोध्ने निर्णय गरेको छ । प्रधानमन्त्री पुष्पकमल दाहाल प्रचण्डको भारत भ्रमणको पूर्वसन्ध्यामा आइतबार बसेको लगानी बोर्डको बैठकले चिनियाँ कम्पनीलाई स्पष्टीकरण सोध्ने निर्णय गरेको हो ।

चिनियाँ कम्पनी चाइन पावरसँग २०२० जनवरी १९ मै परियोजना अघि बढाउने विषयमा सहमति भएको थियो । तर, हालसम्म पनि सहमति पालना नभएको भन्दै बोर्डले स्पष्टीकरण सोध्ने निर्णय गरेको हो । चिनियाँ राष्ट्रपति सी चिनफिङ नेपाल भ्रमण आएका बेला भएको उक्त सम्झौताबारे पुनर्विचार गर्ने तयारीमा सरकार पुगेको हो ।

यता, तल्लो अरुण भारतीय कम्पनी सतजल विद्युत निगम (एसजेभीएन)लाई दिने विषयमा २०७८ सालमै सहमति भइसकेको छ । लगानी बोर्ड र भारतीय कम्पनीबीच सहमति भइसकेको उक्त आयोजनालाई अघि बढाउन सरकारले दोस्रो चरणको सम्झौता गर्न लागेको हो ।

झण्डै एक खर्ब बराबरको लगानी हुने उक्त आयोजनाबाट ६ सय ७९ मेगावाट विद्युत उत्पादन हुनेछ । तत्कालिन प्रधानमन्त्री केपी शर्मा ओलीले भारतीय कम्पनीसँग उक्त आयोजनाबारे सम्झौता गरेका थिए । जसलाई अघि बढाउने तयारीमा सरकार पुगेको हो ।

सम्झौताअनुसार उक्त आयोजनाबाट नेपालले भने २१ दशमलव ९ प्रतिशत अर्थात् १९७ दशमलव १ मेगावट विद्युत निःशुल्क पाउनेछ । त्यहाँ उत्पादित बाँकी विद्युत भने भारत निर्यात हुनेछ ।