Sansar News
काठमाडौं । सरकारले अब सातै प्रदेशमा रहेका किसानहरुका खेतबारीमै प्राविधिक पठाउने घोषणा गरेको छ ।
‘खेतवारीमा प्राविधिक सेवा, उत्पादनमा टेवा’ भन्ने नाराका साथ हरेक स्थानीय तहमा कृषि एवं पशुपंक्षी विषयका स्नातक तहका जनशक्ति परिचालन गरिने बताइएको छ ।
आर्थिक वर्ष २०८०/८१ को बजेट भाषणमा अर्थमन्त्री डा. प्रकाशसरण महतले यस कार्यक्रमका लागि ४७ करोड बजेट विनियोजन गरेको बताएका छन् ।
यसबाट किसानले खेतबारीमै प्राविधिक सेवा प्राप्त गर्न सक्ने विश्वास अर्थमन्त्री महतले लिएका छन् ।
रसायनिक मलका लागि ३० अर्ब विनियोजन
त्यसैगरी अर्थमन्त्री डा महतले किसानलाई रसायनिक मलमा अनुदानका लागि रु ३० अर्ब विनियोजन गरेको जानकारी दिएका छन् ।
रसायनिक मल खरिद प्रक्रियामा सुधार गरी समयमानै आपूर्ति सुनिश्चित गरिने र मल आपूर्ति र वितरण प्रक्रियालाई व्यवस्थित तथा पारदर्शी बनाउने बताइएको छ । साथै देशै मल कारखाना स्थापना गर्न विस्तृत परियोजना प्रतिवेदन तयारी गरी सार्वजनिक नीजि साझेदारीमा लगानी बोर्डमार्फत् काम अगाडि बढाउने समेत बताइएको छ ।
वि.सं.२०८० जेठ १५ सोमवार २०:२६ मा प्रकाशित
