हामी सबैकाे संसारन्यूज

काठमाडौं । बिहीबारदेखि भृकृटीमण्डमा सुरु भएको शैक्षिक मेला काठमाडौं महानगरपालिकाले रोकिदिएको छ । मेला उद्घाटन भएको केही समयपछि महानगर प्रहरीले नियमसंगत नभएको भन्दै रोकिदिएको हो ।

महानगरको नगर प्रहरी उपरीक्षक मनोप्रसाद लामिछानेले बताएअनुसार मेला सञ्चालनका निम्ति स्थानीय तहसँग अनुमति नलिएको र कक्षा ११ र १२ को नतिजा नै नआई भर्ना लिएको भेटिएपछि मेला रोकिएको हो ।

अग्रिम भर्ना लिन नपाउने कानुनी व्यवस्थालाई लत्याउँदै मेला सञ्चालन भएपछि बाध्यकारीरुपमा मेला रोकिएको उनले बताए ।

“उहाँहरुले कानुनलाई उल्लंघन गर्दै मेला सञ्चालन गर्नुभएछ, कानुनी व्यवस्थाअनुसार कुनै पनि कक्षाको नतिजा नआई अग्रिम भनाई लिन पाइँदैन, तर उहाँहरुले भर्ना अभियान नै चलाउनुभएछ”, लामिछानेले संसार न्यूजसँगको कुराकानीमा भनेका छन्, “कानुन उल्लंघन गर्ने अधिकार कसैलाई हुन्न, महानगरभित्र कानुनविपरित हुने गतिविधि रोकेका छौं ।”

उच्च शिक्षा पढ्न चाहने विद्यार्थीहरुलाई लक्षित गरि हिसानले बिहीबारदेखि शैक्षिक मेला आयोजना गरेको थियो । मेलाको उद्घाटन सभामुख देवराज घिमिरे र वरिष्ठ कलाकार मदनकृष्ण श्रेष्ठले गरेका थिए ।

आइतबारसम्म सञ्चालन हुने भनिएको मेलामा ७५ भन्दा बढी स्टल राखिएका थिए ।