हामी सबैकाे संसारन्यूज

काठमाडौं । प्रधानमन्त्री पुष्पकमल दाहाल ‘प्रचण्ड’ले पाँच वर्ष गठबन्धन केही नहुने बताएका छन्। धादिङको गजुरीस्थित आदर्श बहुमुखी क्याम्पसको भवन उद्घाटनका क्रममा प्रधानमन्त्री प्रचण्डले यस्तो प्रतिक्रिया दिएका हुन् ।

‘अहिले कताकता यो सरकारको आयु कति ? भन्ने पनि मिडियामा हुने नहुने तपाईंहरुले हेर्नुभएको होला, सुन्नुभएको होला’, उनले भने, ‘मैले प्रधानमन्त्रीको हैसियतमा र मेरो लगातार गठबन्धनसँग भएका बैठकहरु, र प्रतिपक्षीसँग पनि भएका बैठकहरुका आधारमा म के भन्न सक्छु भने, पाँच वर्ष यो गठबन्धन केही हुनेवाला छैन। हेर्नुहोला ।’

१८ औं सताब्दीमा कार्ल मार्क्सले ‘समाजवाद र साम्यवादको परिकल्पना गरिरहँदा दुनियाँले के भन्छ नसोची तिमी आफू आफ्नो उद्देश्यमा अगाडि बढ !’ भनेको स्मरण गर्दै प्रचण्डले हाल आफ्नो सरकार र गठबन्धनका बारेमा अरुले भन्ने गरेका कुरामा भन्दा पनि राम्रो गर्दै जाने आफ्नो ध्यान रहेको उनको भनाइ थियो ।

उनले नेगेटिजम् प्रवृत्ति विकास भइरहेकाे भन्दै त्यस्ता विषयलार्इ वेवास्ता गर्दै आफूले राम्रो गर्दै जाने बताए ।

‘मानिसहरुले यो धेरै राम्रो भएको नरुचाउने, आजभोलि नेपालमा एउटा नकारात्मक मानसिकता हरेक कुरामा नेगेटिभ हेर्ने, पोजिटिभ हेर्नै नसक्ने त्यो प्रवृत्ति पनि देखिएको छ। मैले त्यसलाई भन्दा पनि आफ्नो ठाउँबाट आफूले राम्रो गर्दै जाने, जनताले त एकदिन फैसला गर्ने नै छन्। राम्रो गर्नेको पक्षमा जनमत बन्ने नै छ ढिलोछिटो भन्ने विश्वासका साथ म अगाडि बढेको छु’, उनले भने।